Uwi na ki muktiar napoh East Jaiñtia Hills, u Kynjaimon Amse da thoh u cha u Project Director ka NHAI Shillong wow dawa wow khang ya kawi na ki ar tylli ki Toll Gate hapoh Ri-loom Jaiñtia deiwa pynksan yeiwa ong u Nitin Gadkari, u Montri ka chnat Road Transport and Highway ha Lok Sabha ha ka 22 Wisu 2022.
Kam wow pynkynmoo heini, u Nitin Gadkari da ong u wa ymtoh u em Toll Gate hapyrdi i jngai wa 60 Km kawi na kawi ha ki sarokbah ka ri wei lada em kam kini daw khang ya ki hapoh le bnai.
U Kynjaimon da ong u wa ini i klam u Montri toh u pynkrehkaam hok ya ki.
Da kdaw u wa ha u sarokbah National Highway-06 em ar tylli ki Toll Gate ha Jaiñtia Hills kawi ha Lumshnong kawi won ha Pasyih (Ialong) heiwa kini jngai ki du 53 Km kawi na kawi.
U Kynjaimon da ong u leh wa katkam ka The National Highways Fee (Determination of Rates and Collection) Rules 2008, i jngai ka Toll Gate toh u man i 60 KM iwa mut wa ymhoi u em palat ya kawi ka Toll Gate hapoh i jngai wa 60 Km ha ki sarokbah.
Hajrong ini da dawa wow khang noh ya kawi na kini ki Toll Gate ha Jaiñtia Hills hapoh 3 bnai kamwa da klam u Montri neibhah lada khrong dan palat ya ini i por daw man i pyrchah ya ka aiñ kamtæ ka NHAI da toh wow pynsmat noh ko wow pyndep ya ini i kaam neibynta i bha i miat ki paidbah.
