Ka KSU Sonapyrdi Unit ynne ka sngi da pynman ko ya ka 3rd Mait Shaphrang Annual Sports Meet 2022 kawa da sahteiñ u pynman nadooh u snem 2020 neidaw wa em ka khlam kawa da ye wow pyndep noh ynne.
Ha kani ka sngi da wan wow chimbynta da ki le tylli ki skur kiwa em hapoh ka chnong Sonapyrdi kitæ ka Govt. Lower Primary School, ka Namchiang Upper Primary School waka Little Flower Lower Primary School.
Kiwa jop da yoh ki da ki takma ksiar, rupa wa tama wei da e leh ya ka Trophy cha kiwa yoh nyngkong, wa ar wa kiwa yoh wa le ha ki yaphet pyllah 100 meter waka Long Jump.
Da em leh i e Trophy cha ki le tylli ki House kitæ ka Green House, Yellow wa Red House ha ka yaleh March Pass heiwa ka Green House da yoh ko yei naam jop Best March Pass, ka Yellow House da yoh wa ar ko katwa ka Red House da yoh wa le ko.
Ha kani ka lympung, u Shaniahskhem Dkhar, Finance Secretary KSU EJHDU da man u kam u kongsan katwa u Daiapherbha Lamare, Secretary ka chnong Sonapyrdi da man u kam u symbood kongsan deiwa emlang ki kattu katni ngut ki waheh, ki manbei wa kiwa sikai wa kynthup ya u Deiniwan Lyngdoh, Organising Secretary KSU EJHDU.
Ka KSU da pynman ko ya kani ka lympung yalehke kam chibynta wow pynwyrngia ya ki khynnah skur wow lait na ki myllien wa sih. Ka yaleh Sports wanrah ko leh yei myntoi ha i chait i khiah wei man ko leh kam chibynta wow pynchlur ya ki khynnah wow mih chakhmat wow ya chimbynta ha ki yalehke Sports manda heh da san.
Da yoh leh i klam wa tbian na u kongsan, u symbood kongsan, u Deiniwan Lyngdoh wa na u B. Puseiñ, Chairman Dongmihngi Sonapyrdi. Da pynlai ya ka yalang da u KS Suchiang, President KSU Narpuh Circle kamjooh u GS KSU EJHDU.
