Ka seiñ wa tip kam ka Lawei Ba Phyrnai kawa da maham ini wadep wow tympdung bomb ha ki thaw puræ nadooh ka yung krehkaam ka MBOSE nadooh ka 1 tarik u Naisan lada u Montri Rangbah ym ye u wow pynyoh kreh ya waroh ki nong Meghalaya.
Ynne won da phah email biang ki cha u Montri Rangbah ka jylla wa cha ki laad pathai khubor wow dawa pynlait ya Julius Kitbok Dorphang uwa da kseh patok ka sorkar deiwa lai booh ya oo samen hapoh ka Bus ha ka ISBT heipor 10:00 waje i miet thij wei lada ym leh yeini daw tympdung ya kawi ka skur Lower Primary School.
Uwa phah ya ka email da pyntipmit u ya idæ kam uwa jooh sikai skur chwa wa pynkut noh da ka sorkar ya ka Contract wei ka Lawei Ba Phyrnai toh ka seiñ kawa nachwa kawa kreh neibynta ka puræ puthi tangwa katni da booh noh ki ya ki khulom wei da chim noh ki da ki AK-47.
Da ong leh ya ka sorkar wym toh u pynlut por ko wow thooh neiwon wan ka email neibhah u Organising Secretary ka seiñ toh uwa da dep puræ M. Tech wei da jied u ya kani ka luti neidaw wa leh ka sorkar.
Ha ka sien wa nyngkong wa da thoh cha u Montri Rangbah, ka Lawei Ba Phyrnai da ong ko wa ka sorkar ym em tip ko kammon hawa da yoh First Class ha ka Chemistry tangwa ym yoh kreh wei da hap wow im hei dooh i duk hadooh wym yoh poisa u thied baam u thied dawai ya ka bei wa u pa wa kjut.
Kamtæ da ong wa u Montri Rangbah ym sñiawthooh u yeini neibhah da im pahooh pahaaiñ u da ka poisa ki paidbah.
Da khana leh wa da em ki 37 ngut kiwa biang yei sap, wa da biang kyrdan tangwa ym yoh kreh kamtæ da chim ki ya kani ka luti wei i ong wa lai puræ yow yoh kreh toh i thok suda.
Puræ leh: Ym em i kheiñstiñ ki pulit yei maham tympdung bomb ka ‘Lawei ba Phyrnai’: Lahkmen
