U Montri wa pait ya ki kaam pohyung, u Lahkmen Rymbui da ong u wa ka sorkar wa ka chnat pulit ym em u kheiñstiñ ko wow man kiwa paitsiar paitbniah hawa em iwon iwon i maham i wow ktah ya i suk i saaiñ ha ka jylla.
Ki kattu katni ki laad pathai khubor da yoh ki ya ka khubor ha ki email yong ki kawa da phah lang leh cha u Montri Rangbah ka jylla, u Conrad Sangma na kawi ka seiñ kawa e pyrtuid ka ‘Lawei ba Phyrnai’ ha i miet ka 1 tarik uni u bnai.
Katkam kani ka wyrta khubor da kam wa da phah da ka seiñ ki khynroo wa da stat, da biang ka puræ puthi tangwa ki wym yoh khih sorkar katwa yaleh leh ki kiwa da em 37 ngut. Ha kani ka email da maham wow sdang tympdung bomb man ka tayaw nadooh 1 tarik u Naisan wow wan ha ki thaw puræ wa em ha Shillong hadooh wa ye ka sorkar u pynyoh kreh ya waroh ki nong Meghalaya.
Hawa kylli hajrong i maham, u Rymbui da ong u wa ka sorkar ym ap ko lada toh kiwa da stat, tangwa kiwon kiwon ki kaam kiwa thmu wow pynthut ya i suk i saiñ ha ka jylla, toh i kaamram yong ka sorkar wow yada ya kiwa chong chnong.
