Ka Dorbar Chnong Loompyrdi Iongpiah chirup i yakrehlang waka HundredFold Academy Shillong ha ka thong wow kdar luti yei thij i pyrkhat pyrdain ki khon khynroo khyllood ka chnong ka thaw chaphang ki laad puræ puthi waphær, ha ka sngi Muchai 9 Naitung da pynman ki ya ka Career Guidance & Counselling ha Yungwalieh heiwa ki khon khynroo khyllood ka chnong ka thaw deilang ki manbei manpa dawan ki wow ya chimbyntalang.
U R.L. Bimee Suwer, General Secretary Loompyrdi Iongpiah hei e ki kyntien yahkhmat da ong u wa i chim ka Dorbar Chnong wow khut ya kam kani ka yalang toh yow tip u sñiawthooh ki khon khynroo khyllood ka chnong ka thaw ya ki laad ki luti næ ki rukom puræ waphær kiwa ye u yoh ne u lai hadien wa da dep ki yei puræ puthi yong ki ha ka Class X wa Class XII kamjooh ki Graduation.
U Sunny Mawlong, Managing Director, HundredFold Academy Shillong kam u bru stat bru chemphang yong kani ka yalang da ong u ya ki khynroo khyllood hawa jied ya ki laiñ puræ puthi waphær toh u man phi kiwa sñiawthooh chwa yei long i man yong phi samen wei ymtoh leh u man phi kiwa lai hei pynbor kiwi wei chooh chooh toh u man phi leh kiwa da tip bniah chwa wow chim phi ya kawon kawon ka luti neibhah i bakla phi u jied ya ka luti næ ka laiñ wa yahaap katkam i man i long wei bor i ye yong phi hadien habood ye u man wan i wiarnar wiarluti ka mynried mankawi ka yong phi.
