Kamwa da jooh yah nadooh i por warim wajah ya ka Chaad Sukra chisien chi snem, ka Seiñraij Wahiajer ha uni u snem da sdang ko ya ka Chaad Sukra haka 14 tarik uni u bnai heipor 12:00 waje pyrdi sngi ha Iawpynsiñ deiwa em chwa ka yalang wa tbian wa pynlai da u Chot Pale uwa man leh u President yong ka Seiñraj Wahiajer heiwa da yoh yei ngooh i dem na u Pyntngenmiki Mulieh uwa man leh kam u President yong ka seiñ khynroo khyllood Ñiamtre Wahiajer.
Da yoh leh yei klam na u Sniawlang Phawa uwa man leh kam u General Secretary ka Seiñnraij Wahiajer wa na u Chanki Nongrum uwa man kam u Ex-General Secretary yong ka Seiñ Kyntu Seiñraij 12 Daloi.
Ya ka bynta ya chaad da pynlai da u Pyntngenmiki Mulieh heiwa da em 22 tylli ki kynhun wa ya chimbynta.
Ynne ka 15 tarik hawa pynkut yaka Chaad Sukra da ya emlang u MLA ka Jowai Constituency, u Wailadmiki Shylla uwa man leh kam u kongsan wei da yoh yei klam na u Wailadmi Mulieh uwa man kam u Assistant Secretary ka Seiñraij Wahiajer, da yoh leh yei ngooh i dem na u Sniawlang Phawa, General Secretary, Seiñraij Wahiajer deiwa emlang leh wa u Waheh Chnong ka Ialong u Ram Phawa wa u Wom Chyrmang, President Seiñ Kyntu Seiñraij 12 Daloi wa u Pyrkhat Shylla uwa man leh kam u President yong ka Seiñraij Ialong iwa da pynbood biang da ki chaad tynre wa da pynlai biang da u Pyntngenmiki Mulieh.
