Ka Chaad Sukra ka Seiñraij Chnong Madur, West Jaiñtia Hills da man kawa phooh wa phieñ ynne ka sngi dei chimbynta chongchit ki khon ka Ñiamtre naki dong ki kur waphær waphær ka chnong Madur deilang i riam tynre.
Da wan sakhi leh ya kani ka Chaad Sukra da u MLA ka thaaiñ u Wailadmiki Shylla, u Kamnipaya Challam, Secretary Lei Synchar Cultural Society, u Langdoh ka Raij Mukhla u Wanbha Lyngdoh, u W. Ryngkhlem uwa da wan mihkhmat naka Seiñraij Tuber wa kiwi de.
Neiliang u kongsan yong kani ka sngi u Wailadmiki Shylla hawa e yei klam da pynsñiaw u i kmen waka Ñiamtre da nangphooh nangphieñ ko naki por cha ki por.
Hajrong i emkaam yaki khon ka Ñiamtre u tip ki yaka ñiam, kyntu u yaki manbei manpa wow sikai wow pynsñiawthooh ki yaki khon heiyatoh waka ñiam ka rukum yow lait ki u jngai naka.
Neitæ da pynrap u leh wa i lai chimbynta haki thaw sikai Ñiamtre waphær waphær man i myntoi wa khroo nadooh wow tip yaka Ñiam kamjooh i chlur wow yieñ ha ki rynsan.
U Kamnipaya Challam hawa pynche yei phær i rukom lehkmen Chaad Sukra katkam wa yah ka juk ka por, ong haroh u waka Chaad Sukra man ko kawa pynyoosuk yei khmat, kawa pynchonchit lyngba i sur rwai, wei kawa pynkdang yei mynsien wa thylli lyngba i sneiñ i kroo.
Ha kani ka sngi da yoh leh i klam na u waheh chnong ka Madur, u Esaid Siangshai, i klam na u President ka Seiñraij Chnong Madur u Jinot Laloo wa kiwi.
