Kawi ka truck TATA 407 kawa thylli ha ka 14 tarik uni u bnai da haap ko cha wah Mynngot hajan i thaw chong lieñ (Boating Point) ha Dawki wei heipor wa noh kani ka truck da em du uwa yoh donhi wei da ngam ko hei thaw wa yillu heiwa ki pulit ka F&ES kamjooh ki tre chnong ymye ki wow sai ya ka wei da hap khut noh da ki pulit ka State Rescue Team (SRT) wei nadooh katai ka sngi da thooh ya kani ka truck kamjooh ya uwa yah yong ka.
Katkam ka yutip wa da yoh da ong wa ha ka 15 tarik hanla dang heh ka um da pyrchang wow thooh ya kani ka truck wa uwa yah yong ka waroh chi sngi wei ha i thaw wa haap kani ka truck leh ymchem de ki ka neidaw wa kmai ka um wei neiliang ki pulit SRT da rai ki wow khut noh da ya ki pulit ka State Disaster Relief Force (SDRF) waka National Disaster Relief Force (NDRF).
Da suba wa kani ka truck da rong ka um ka cha Bangladesh, neibhah wa u pood leh jngai u du kamwa 50 Meter na ini i thaw wa jia wei da kyntu ya ka SDO (C) Amlarem Sub-Division wow paan yarap noh na ka SDRF nadooh ka 16 tarik wei wow pyntip leh ya ki chipai ka BSF wa BGB hajrong ini.
Ha ka 16 tarik da chem ya ka truck tangwa ymye wow khwe ya ka neidaw wa jngud ware ka um ha kani ka wah.
Khaddooh ha ka 17 tarik da chem ya i metyap uwa yah kani ka truck ya uwa da tip kam u L. Pathaw, uwa na Eastern West Khasi Hills wei da chem ya i metyap yong oo na chiliang u pood ka ri ha Bangladesh wei hadien wa da leh yeiwa emkaam da ekti ya i metyap yong oo ha ki chipai ka BSF wa ki pulit ka Dawki Police Station neitæ da ekti won ya i metayp cha kiwa hayung yong oo.
Nadooh ynnin hadooh ynne ya kani ka truck ympu ye u sai hadien wa chem ya ka neidaw wa dang jngud ka um kamjooh leh wa dang khlan ka um ha kani ka wah wei daw pyrchang hei step ka 19 tarik.
