Ka District Water & Sanitation Mission (DWSM)-PHE, West Jaintia Hills District, da lehkmen ko ya ka World Earth Day ynnin ka 22 tarik deiwa pynman yei pynsñiawthooh hajrong ka phang “We need a lot of blue to remain green” iwa mut emkaam ya ka um yow yirngam ki chnong ki thaw deiwa lai paidbah nadooh na laad BDO Office, Laskein deiwa lai lyngba u sarok Mukhap ter-ter hadooh ha yaw Mowkaiaw wei da pynkut leh ha Mowkaiaw Dorbar Hall.
Katwa dang ha luti (Walking Awareness) da batai wei da pynsñiawthooh leh ya ki bru ha luti syngkieñ wei da saam leh ya ki kot lakdop chaphang ka Jal Jeevan Mission, i rukom noh yei jhep wa ka rukom pynemkaam ya ka um slap. Da kbai leh ya ki kyntien “Save Water Save life” “Em ka um em i im”.
Ha yaw Mowkaiaw da pynman ya ka yalang pynsñiawthooh paidbah yow ban khia kammon u noh yei jhep dei rukom wa biang wei da pynsñiawthooh leh wym hoi u noh yei jhep cha nala neibhah manda slap daw tooid ki jaklia cha ki wah ki umbaam umdih wa pynemkaam i man-ka-sngi. Wei yeini lada ym ye u syndong bha dow man kjut ko hadien habood.
Da e nongmuna leh wa kam ki Plastic song kwai, ki Plastic song baam lada man ki kiwa khian lane kiwa eh tangwa slem ki u pyut wei pynsih ki leh ya ka rymaw.
Da batai leh chaphang ka Jal Jeevan Mission ka wow pynyoh umkor cha kawi pa kawi ka thlu yung ha ki chnong palatsor wa cha ki skur wa ki Anganwadi. Da kyrpaad leh ya ki chnong wow ya krehkaam lang ki wa ka chnat PHE yow ye u pynmankaam ya ini i thmu.
Ha yaw leh da saam ya ki kot lakdop wei da batai bniah leh ya kiwa chong dukan chaphang ka JJM wa i rukom noh yei jhep.
Da lehkmen kyrpang ya kani ka sngi deiwa pynman ya ka Street Play na ki Mega Fun (YouTuber) hajrong phang Conservation of Water.
Da ya chimbynta leh ha kani ka sngi da ki skur wa ki Self Help Group na ki chnong Laskein, Mukhap wa Mowkaiaw.
