U Montri wa pait ya ka chnat puræ puthi ka jylla, u Lahkmen Rymbui da ong u wa kiwa sikai Adhoc da thung bait da ki School Managing Committee, katwa yei yarap poisa da e da ka sorkar cha ki SMC yow pynlai ya ki skur wei yow su ya ka tulop kiwa sikai, wei da pynrap u wa ka sorkar ye ko wow pynku ya ka yarap poisa cha ki skur, ya kawa katni dang bichaar bniah.
Da pyntip u leh wa ka sorkar ka pynlut ko hadooh T. 1700 klur chi snem du ha ka puræ puthi, wei ka sorkar ym kynran dien ko na iyi wa toh u leh, tangwa daw pait leh ya i rukom pynkrehkaam, khnang wa ym ktah won ya kiwi ki kaam yong ka sorkar.
Kam wow pynkynmoo wa kiwa sikai Adhoc hapoh yong ka FASTOM da mih paidbah ki ha ka 22 tarik uni u bnai yow dawa pynku tulop naka sorkar, wei hadien wym mih soh i yaklam wa ki sahep ka chnat puræ puthi, da pynbna wow pteiñ yei yakhih da ka ‘Non Co-operation’ namo wym ya krehlang waka sorkar.
Neiliang u Montri, da kyntu u ya kiwa sikai Adhoc wa toh u kreh bait yei kaam wa da pynkup ha ki, ym toh wow pynman langknia ya ki khynnah skur, wei da kyntu u leh ya ki School Managing Committee (SMC) wow pait yei pynlai bait ya ki skur.
Hawa kylli, u Rymbui da ong u wa daw paan ya ka bui (Report) yong kani ka yakhih wa hadooh katwon ngut kiwa sikai kiwa da pynman yakhih deiwa khlem lai cha ki skur, wei hadien itæ ka sorkar daw pait ko ya iyi wa toh u leh ko.
U Rymbui da ong u wa kiwa sikai toh u sñiawthooh ki wa i krehkaam yong ka sorkar ym toh iwa suk wow chim ya kawon kawon ka rai, neibhah kawon kawon ka rai wa chim katni daw ktah leh hadien habood, wei da pynrap u wa kiwa sikai toh u lai hikai yow ye ka sorkar wow bichaar ya iyi wa toh u leh neibynta i bha wei u biang lang.
