Ka yalehke hapyrdi ka Ri-Bhoi waka East Khasi Hills haka Group A ka Zone 1 ka Inter District U-19 Boys Cricket Tournament ka Meghalaya Cricket Association wa da pynman da ka AJCA ha Khliehtyrchi ynne ka sngi ym em wow yoh u pyndep neidaw wa joor u slap iwa mut wa ka Shillong CA (B) da yoh ko wow psiah cha ka Zonal Final.
Ha ka Zone 2 won wa pynman ha Tura, ka South Garo Hills da jop ko ya ka North Garo Hills da 5 Wicket.
Ynne kawa man leh ka yalehke wa khaddooh hapoh ka Group A ka Zone 1, ka Ri-Bhoi da emkaam ko wow jop da iwa rap boon ya ka EKH yow yoh nyngkong ha ka Group A deiwa kheiñ da ka Net Run Rate. Heiwa da sdang ki deiwa biang yow yoh 162/6 na 22.3 Over deiwa kamai 7.20 Run chi Over hadien wa jop ya ka kylla-khlem. Tangwa neidaw wa joor ware u slap ym ye de wow pteiñ yei yalehke iwa da man iwa sih bhah ya ka Ri-Bhoi. Hanla kattæ leh, u Reshab Subedi da lehbha u deiwa kamai 59 Run na 42 bol (8×4, 2×6) katwa u Raj Kishor Yadav (2/32) wa u Rahul Kumar (2/47) da yoh ki wow pynhaap mar ar Wicket.
Ha Tura, ka NGH da jop ko ya ka kylla-khlem wei da jied ko wow Bat nyngkong heiwa da kamai ko da 104 na ki 30 Over. U Chugrak Momin da kamai boon dooh u da 23 katwa u Anikit Sarkar da yoh u 4/7 na ki 5 Over, u Sunbirth M Sangma 2/4 wa u Chengsrang S Marak 2/16.
Hawa e yei jubab, ka SGH nyngkong da chem chitom ko deiwa yoh 36/5 ha iwi i por tangwa ka 72 Run hapyrdi u Salchang Sangma (56 Not Out) wa u Sunbirth (26 Not Out) da pynyoh yei jop. Waroh kini ki ar liang ym toh de kiwa yaknieh psiah Final.
Ha kani ka 30 tarik, ka SCA (B) daw yachem ko waka All Jaintia CA ha ka Zone 1 Final yow jied ya kiwa yoh ya yachem waka East Garo Hills ha ka State Final ha ka 2 tarik u Naisan.
