Uwa e buit ya u Montri Rangbah kamjooh u MLA heijooh i por u MDC, u Lambor Malngiang ynne ka sngi da wai u ya u sarok wa jrong 2.00 Km (Phase-1, Length = 1.50 Km) Internal Road namo u sarok chnong ka chnong Urmasi-U-Joh, East Khasi Hills District ha ka yalang wa pynman ha Community Hall, Urmasi-U-Joh.
Uni u sarok toh uwa da chna hapoh ka RIDF-XXV yong u snem 2019-2020.
Hawa e yei klam, u Lambor Malngiang da ong u wa kani toh ka sngi wow sahkynmoo ya kiwa chong chnong heiwa waroh chi kattu da man ki kiwa da chah ktah nei sih uni u sarok tangwa deiwa yoh ya uni u sarok thymme da yoh kyrmen ki paidbah.
Da e khublei u ya kiwa chong chnong yei ya krehlang ki yow ye u pyndep yei chna ya uni u sarok deiwa ong leh wa kani toh ka kitkhlieh lang yong waroh iwa daw pynmyntoi ym du ya ka chnong kamjooh leh paidbah hi waroh.
Da pyntip u leh wa i chna pyndep ya uni u sarok da pynslem da ar snem neidaw wa em ka khlam COVID-19 deiwa e khublei u leh ya ki Contractor yei kreh chitom ki wow pyndep smat ya uni u sarok.
Kiwi de kiwa da emlang ha kani ka sngi toh u S. Lytep, E.E PWD (Roads) NH Shillong Bypass Division, u Sordar wa ki dkhot ka Dorbar Chnong.
