Ki MDC yong ka National People’s Party (NPP) ha Khasi Hills Autonomous District Council (KHADC) da pynsñiaw ki wym embynta ki iyi iyi leh hawa yatoh wow lai ujor cha ka ujor cha Kasari ya ka soskular pynbait pood namo ka MoU wa da soi da ki ar ngut ki Montri Rangbah ka Assam wa Meghalaya.
Hawa pynche hajrong ini, u Deputy Chief Executive Member ka KHADC, u Gigur Myrthong da pyntip u wa ym em u ha ka Boundary Committee yong ka KHADC, tangwa i em yong oo ha ki ar tylli ki yalang ka Boundary Committee toh neidaw wym em u Chief Executive Member, u Titosstarwell Chyne.
Da ong u wa ka KHADC ym em rai ko wow ujor pyrchah ya ka Memorandum pynbait pood yong ka jylla Meghalaya wa Assam, tangwa da e laad ya ki hima wa ki tre khyndaw wow lai ujor cha Kasari lada em ki ya ki dulir næ ki kot ki sla kiwa biang.
Kam wow kdaw heini, u Montri Rangbah ka jylla u Conrad K Sangma, uwa man leh u President ka seiñ National People’s Party (NPP) da ong u wa i rai yong ka KHADC wow lai choh dwar ka yung bichaar toh iwa da chim da ki kattu katni ymtoh da ki MDC ka NPP.
Neiliang u MDC ka NPP na Umroi uwa man leh u Executive Member, u Rangkynsai Kharbuki da ong u wa ka rai wow ujor cha ka Kasari ymtoh kawa da chim da ka Executive Committee yong ka KHADC, tangwa neiliang ka KHADC da klam che ko wa lada em i wym hun ya ka soskular ye ki wow lai cha ka Kasari. Da ong wa neiliang ki MDC ka NPP ha KHADC ki kyrchaan pura ki ya ka rai yong ka sorkar hawa yatoh wow pynbait ya u pood u ang wa ka jylla Assam.
