Ki khynnah skur wa em hapoh ka chnong Jowai ha kini ki sngi da yoo yei mih sarok yong ki wow e wyrta chula ha man ki dong ki chnong chaphang i sih wa mih nei pynemkaam yow sikret, duma wa kiwi ki jait baam wa chna na u duma.
Ya kani ka mih sarok datip kam ka “Rally Against Tobacco” wa da hukum u leh da waroh ki skur hapoh ka jylla lyngba ka Meghalaya Health Mission chirup wa ka yung krehkaam yong i puræ puthi wa em haman ki District yong ka jylla wei ka thong yong kani toh chibynta ka dak yong i leh burom ki khynnah skur ya ka “World No Tobacco Day 2022” kawa haap ha ka 31 Naisan 2022.
Kani toh ka prokram wa da pynman hei dur yong ka yakob næ Competition wei da e laad ya ki skur waroh wow yachimbynta nadooh ki Lower Primary hadooh ki Secondary Level wei da sdang ko nadooh ka 14 tarik Naitung 2022 katwa u pynkut won ya ka ha ka 20 Naisan 2022 wei ki skur wa ya chimbynta hap ki u bood ya ki kyndon wa da booh.
