theme-sticky-logo-alt
theme-logo-alt

Pyndep ki paaid Muslim ka Jowai ya ka Eid Ul-Fitr

Ynne ka sngi ka 3 tarik kamwa da leh ha kylleiñ ka pyrthai, ha Jowai leh ki khon wa ngait ya ka niam Islam (ki Muslim) da pyndep ki ya Eid Ul-Fitr ka lehniam kawa jooh pynman chisien chi snem wow e ngooh wei e khublei ya u Allah (Blai). 

Kani ka lehniam da pyndep hadien u bnai Ramadan u bnai wa pyndep ki ya ka Ramzan iwa mut wa ki Muslim da chah thngan ki kamwa chi bnai man-ka-sngi nadooh i step chwa wow mihsngi hadooh i janmiet hadien wa sepsngi.

Ya ka lehniam da pyndep kam ka dak wow em i yabha yamiat wa i maya hapyrdi uwi wa uwi wei ymtoh u man ki kiwa yachoon wei wow em i burom markylliang.

Ynne i step ha Jowai da pyndep ya i ngoohblai næ ka Namaz ha Masjid kawa em ha Chahtngit, Iawmusiang, Jowai wa yahkhmat da u Imam næ u heh niam ki Muslim ha Jowai, u Abushid Barbhuiya heiwa da yahkhmat u wow puræ u ya i bynta na ka kotniam Quran.

Neiliang u Abushid Barbhuiya da ong u wa kamwa man kiwi ki niam, ka Islam leh em ko ya ki kyndon wow bood heiwa da pyndep ki ya u bnai Ramadan namo wow chah thngan deiwa burom iwi ya iwi khlem klam beiñ ya kiwi wei wow kynmoo leh ya u Allah (Blai). Da ong u wa katkam i sikai ka Islam toh wa na ki 12 bnai ha ka chi snem emkaam chi bnai won toh wow leh Ramzan. 

Da ong u leh wa katkam ka Islam emkaam wa ki mahajon u e ki kajiak na ka spah yong ki heiwa chisien chi snem emkaam u e yarap ya ki manyung wa duna hei yoh i laa khamtam ki janyung ya kawa tip leh kam ka Zakat deiwa burom leh ya kiwi ki jaitniam deiwa kheiñ burom wei maya ya kiwi. 

Chooh chooh da pyntip u wa hadien wa kut u bnai Ramadan manda mih u bnai emkaam wow lai won cha ki Masjid wow e ngooh wow e khublei ya u Allah. 

Share this:
Previous

Ha ka thong wa ong “Rally Against Tobacco” mih sarok ki khynnah skur

Next

Kitbok ka HITO West Jaiñtia ya ki khynroo khyllood ha ka Meghalaya Games