Pyrchah ka KJNU yei thmu kyrriah ya u DC, WJH

Jowai : Ka Seiñ Khasi Jaiñtia National Union (KJNU), da pynsñiaw ko yei pyrchah joor yei thmu ka sorkar wow kyrriah noh ya u Deputy Commissioner ka West Jaiñtia Hills District, u Arunkumar Kembhavi (IAS).

Neiliang ka seiñ da ong ki wa uni u DC wa katni toh u kyrchaan ya oo da waroh neibhah man u uwa biang uwa da wanrah boon i kylla hapoh ka district. Yeini da leh u du ha ki chi snem ar bnai wa man u kam u DC wei neilaing ka seiñ da kynmoo ko yei katwon wa kreh chitom u heipor wa yut chnong ki bru Pnar wa sah Bock-I ynnin u snem wei da li hiar u cha kini ki thaiñ yow yaklam wa ki bor ka Assam yow wanrah biang ya i suk ha pyrdi ki Karbi wa ki jait bru yong i.

Chooh chooh da ong wa u DC man u uwa smat wa stin u leh yeiwa emkaam wa ood wa ujor ki paidbah ha oo. Kamtæ ka seiñ ong ko wa ka ym em yatoh ko wa oo tangwa bichaar ko ya ki kaam wa da dep leh u wei yow neh yow ye u pyndep ya ki kaam wa da sdang u.

Ka seiñ leh da ong ko wa ka sorkar toh u bichaar bha ko dei miat wei ymtoh u ap ki ya ka la-ær wa beh cha wah cha neiñ. Ka sorkar ym toh u leh chiliang khmat ko neibhah wa uni u DC dang kreh u du chibet por donhi wei lada kwah ko u kyrriah toh u kyrriah ko ya ki ophisar wa da kreh palat por.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

Ka sorkar chwa u kyrriah ko ya u DC WJH toh u pynche ko ha ka yi ka nongrim wa kyrriah ko neibhah da leh u chiboon ki kaam wa ym jooh em wa ye u leh nadooh wow pynkhooid yei rukom krehkaam ka DSC, u chna ya ki footpath wei kamjooh yow pynman ya ki chnong ki thaw kiwa khooid wa suba. Wei kiwa kwah wow kyrriah ya oo toh kiwa da dooh laad u leh ki katwa kwah ki.

Lada ka sorkar leh ko deibor wow kyrriah ya u DC neiliang ka seiñ ka ym elaad ko wei daw pynman ko da i yakhih paidbah wei lada jia katwa em iwa sñiawsih haap bah khlieh ka sorkar.

Sa i wi wa leh u DC toh wow pynkreh biang yei chna ya ka yingkieñ Kureliya ka wa da sah teiñ kattu la 13 snem.

Ka seiñ da kyrpad ko ya ki MLA yong ka Ri-loom Jaiñtia wow kynmoo ki yei por wa ki yieñ wow pynbna maya ri maya jait bru wow pyrkhat ki ya ki para doh para snam yow ya tylli ki wow pynneh ya uni u DC.

Kani toh katkam ka khubor wa pynmih da u president ka seiñ u Niman Shadap.