Ka Dorbar Chnong Wapungskur, East Jaiñtia Hills da dawa ko naka GR Infra Projects Ltd kawa pynchna ya u sarok NH-06 wow pynbha wei wow kreh noh ya ki bynta kiwa dang sahteiñ yong uni u sarokbah wa lai lyngba ka chnong Wapungskur.
Neiliang ka dorbar chnong da dep ko wow e dorkhat cha ka GR Infra Projects Ltd, kawa da yoh Contract wow chna ya uni u sarok hapoh ka NHAI heiwa ha ka dorkhat da dawa ko wow pynchna pynbha ya ki bynta wa chlai um hapyrdi sarok wei wow chna ya ki dooid harood sarok, ki luti lai kjat, ki Guard Wall, ki Traffic Light wa ki Signal deilang wa ki Rumble Strips.
Katkam wa man kattæ da em boon ki bynta yong u NH-06 wa haap hapoh ka chnong Wapungskur kiwa dap um smam hapyrdi sarok ha i por lyiur hadooh wa da tooid ka um cha pchem yung ki bru wa cha ki thaw wym toh u tooid ka um neidaw wym biang ki dooid.
Da dawa leh wow booh ya ki Rumble Strip ha ki artylli ki thaw wa emkaam bha kitæ kiwa em ha laad wow lai cha Step By Step Secondary School Wapung wei leh cha K.B. Memorial Secondary School Wapung neibynta i bha i miat yong ki khynnah skur.
Ka kyrwoh na u Deolangki Dkhar, Waheh Chnong ka Wapungskur.
