Ynne ka sngi, u Montri ka chnat pynroi sor ka jylla, u Sniawbhalang Dhar heipor wa wan wai yaka Renovation of Jowai Water Supply Scheme, da kyntait u yeiwa klam ki kattu katni ngut kiwa ong “Nadooh wa jied ya ka NPP ha Jowai ym em iyi iyi”, deiwa pynrap wa na ki 60 Constituency, kiwa boon dooh ki kaam pynroi poi ki ha ka Jowai Constituency.
Da kdaw u ya ki kaam wa daw leh ha Jowai Constituency kiwa kyntup ya ki Smart Road wa em kamwa 33 Km tam ha i dor wa T. 26 klur ya kiwa daw chna da ki kor wa heh.
Heiyatoh wa u sarok Jowai Bypass na Thadlaskein hadooh Soomer da pynlait ya ka T. 15 klur wow siang psiang (Resurface) biang ya uni u sarok.
Chooh chooh da ong u wa daw mang ya ka Jowai kam ka thaw pyrdi wow uiñke namo ka Tourist Destination heiwa da mang hadooh T. 36 klur wow chna pynmiat ya ka deiwa kdaw leh ya ka Beautification of Jowai Town heiwa daw pynmiatdur ya ka deiwa booh wa ki thaw paitke wa kiwi kiwi.
Heijooh i por da kdaw u ya u sarok Moodymmai-Sohmynting-Demthring (DSM Road) da boonsien wa klam ha kiwi ki sorkar khlem poi cheiwon cheiwon tangwa katni da ye wow siang psiang waroh deiwi ha i lut wa T. 45 klur wei ka sarok na Treiongriang hadooh ha Laad Mustem yong u Dawki-Amlarem-Jowai Road dadep wow chna ha kani ka tayaaw wa dadep.
Chooh chooh da pyntip u ya u sarok na Treiongriang hadooh Riatturiem (Khliehtyrchi) i kreh ha uni u sarok leh da sdang i.
“Kwah O u man ka Jowai kam ka Shillong,” da ong u Sniawbhalang deiwa pyntip wa da yaklam wow wanrah ya ki kreh heiwa ki bru wa uiñke suwari barabor sah ki ha Shillong tangwa angnood wa neini ki bru u sah ki ha Jowai manda wanke ki cheini.
U Sniawbhalang Dhar da ong u leh wa ya ka Mini Secretariat manda dep ya ka, ka yung krehkaam (Office) u Deputy Commissioner u man noh ko kam ka Mall.
