Ynne ka sngi da pynkut ya ka 3rd 7-A-Side Knock Out Football Tournament 2022 wa pynman daka Sports & Games Committee yong ka chnong Panaliar Jowai, heiwa da yachem hapyrdi ka We Sport FC pyrchah yaka Elang Ki Oo FC.
Hachwa wow sdang ya ka yalehke, da em chwa ka yalang tbian wa pynlai da u Waheh Chnong Panaliar, u Riquoma Rq. Laloo heiwa da e haroh yei ngoohblai da u Lamyooki Shullai. U Waheh Chnong da khana u wa ya kani ka lympung nadooh ki snem nachwa, da sdang hi hapoh ka Panaliar, katwa em kawi ka seiñ kiwa ka-it yalehbol yong ka dong ka chnat, da pynman ki ya lympung wa mar 9 ngut chiliang. Heitæ i por kiwa yalehke wa wan toh na kylleiñ ka jylla Meghalaya. Hadien neitæ da sdang da ka chnong hi wow pynman yaka “Tiger 7” kawa yalehke mar 7 ngut chiliang, kamtæ na kipor cha kipor, chong hei em ki Secretary wa Chairman wa ka-it u kreh chitom dang ye u pynman, hadien neitæ da sangeh ko. Neitæ da mih won kini kiwa katni, kiwa da sdang won ya kani ka 7-A-Side Knock Out Football Tournament kattu la 3 snem wei daman ko kawa lai bait lai ryntih. Ong u leh wa i por toh iwa kordor tam, khamtam kiwa yalehbol toh u embha ki ya ka akor ka burom wei wow tip u kheiñkor yei por.
Neiliang u kongsan, u Saron Pasweth uwa man heijooh i por u MDC ka Jowai South Constituency; da kyntu u ya kiwa yalehke wow kune ki ya ka sap ka yong ki, kawa da em ha ki, khlem da pyn sep-ai ya ka. Neibhah kani hi ye ko u pynyoh myntoi ya ki samen samen, khamtam hei kreh i khih. Ha ka yalehke Sport, em bait i jop wa i rem, kamtæ kiwa jop leh ymhoi u sarong ki, katwa ki warem leh ymhoi u yaamrem palat ki, toh u nang yaleh chitom yoh u man kiwa jop ha ki sngi wow wan.
E yaroh u ya ka chnong yong oo dahi, wa man ko ka chnong wa ye u pynlai bait lai ryntih ya kani ka lympung, kamwa ong u Waheh Chnong wa nadooh nachwa leh da sdang ya ka. E yaroh u ya kiwa krehkaam chnong wa em ki ka mynsien tylli tæ ye ki u pynphet ya kiwa boon ki kaam ka chnong.
Da yoh ya ki kyntien e khublei na u General Secretary ka chnong Panaliar, u Careme Phawa uwa da pynsñiaw yei sñiawngooh kyrpang ya u kongsan wa da jooh ya chimbynta u wa ka chnong ha kiwa boon ki kaam yong ka khlem da kyntait ha wa khut ya oo.
Ka yalehke Final man ko kawa yoosuk hadooh kattæ kattæ, heiwa hadooh wa kut i por ym em kiwa ya thap kool, hadien neitæ da pynman da ka yachut Tie Breaker heiwa da yoh da ka Elang Ki Oo FC yei naam jop.
Yei naam Man of the Match da yoh rah da u Felickson Pasleiñ yong ka We Sport FC katwa ya ka naam Best Goal Keeper da yoh rah da u Confirm Bang yong ka Mency FC.
