Hadien wa kawi ka manbei kawa tip kam ka Linda Nongkrem kawa naka chnong Lumtrep Nongjngi wa ki kattu katni ngut da lai ujor ki cha u DC ka West Jaiñtia Hills pyrchah ya u Pyniaiddame Pale uwa saam khoo rachon namo u Fair Price Shop Dealer ha Lumtrep & Iangker Centre neidaw wym yoh khoo rachon ki uwa T. 3 chi kilo nadooh u Thohlakhmi (Feb) 2022 heiwa da pynbaad wa u waheh chnong ka Lumtrep, u Ebormi Pale da ong u wa lada ym chim hei dor wa T. 4 chi kilo ym yoh khoo wei ym ym toh wow chim khoo na kani ka thaw.
Neiliang ka chnong da pynche ko wa ya u khoo rachon nadooh u snem 2021 da khut ya ka dorbar neibynta wow pynbait wei hadien i pynbait da mih ar tylli ki rai wa lada em kiwa chong chnong wa ye u man kam ki Dealer ki wow dai ya u khoo hei dor wa T. 3 chi kilo uwa 5 kilo chi khlieh bru wei wow pyntip cha ka Vigilance Committee yow pynskem kam u/ka Dealer wei hadien ini da pynyaleh da ka Election wei da e laad wow dai ya uni u khoo hei dor wa T. 4 chi kilo.
Kamtæ ha uni u snem 2021 da em 4 ngut kiwa yaleh (Applicant) wei da jop da ka Linda Nongkrem wei waroh chi snem ym em iwon iwon i ujor.
Ha u snem 2022, da hap wow chim biang da ka rai wow pynthymme heiwa da em ar ngut kiwa yaleh kiwa kynthup ya ka Linda Nongkrem wa u Pyniaiddame Pale heiwa da jied ya u Pyniaiddame Pale. Kamtæ ha ini i por ka Linda Nongkrem da pynmih ko yei pynbaad yei rukom dai rachon manda yoh da kiwi wow dai rachon.
Heiyatoh wa i chah pynbaad wa da chah maham kyntait chnong ya Linda Nongkrem, da ong wa ini toh du wow pyndooh burom ya ka chnong wei kamjooh ya u waheh chnong. Wei iwa phylla chooh wa kammon u maham kyntait chnong ya ka Linda hawa u kurim ko toh u Assistant Waheh Chnong wei heijooh i por man u kam u Chairman chnong.
Hawa yatoh wa i pynbaad neibynta i kreh chi spah sngi, wa heipor wa mut ki wow lai soi ya ka Job Card, wa u waheh chnong da kular u wa waroh kiwa em Job Card ym emkaam wow lai kreh wei ya ka poisa kawa T. 3000 kawi ka Job Card daw ya saam wa u waheh chnong mar T. 1500. Neiliang ka chnong da pynche ko wa da pynbait wow noh synniang cha ka chnong neibynta wow thied thaw chnong neibhah wa kiwa chong chnong man ki kiwa dooh wei da pynbait wow e kajiak chi bnai hadooh wow dap u thied thaw ka chnong. Kamtæ da ong wa ini ym ktah ko ya ka kreh 100 sngi wei ym dei pynbor ya kiwa chong chnong wow e sñiawbha wei chong hei sñiaw yong uwi uwi lane kawi kawi kawa chong chnong.
Kamtæ da ong wa ini waroh i chah pynbaad ha ka Linda Nongkrem toh kiwa bakla suda wei neiliang ka chnong da e por ko ya ka wow wan paan maap hadooh ka 31-05-2022 wei lada ym leh ko yeini daw lai cha ki bor ka aiñ neibhah wa da pyndooh burom ya ka chnong kamjooh ya u waheh chnong.
