Da: U Chandame Sungoh
Wym ye de i u em kawi ka Party,
Lane kawi don ka niam;
I yaryntih waka yatylli,
Itæ se wa emkaam tam.
Wym ye de i u em kawi ka seiñ,
Næ kawi don ka Balang;
Da ka yatylli chirup u yieñ,
Wow pynbha imlang sahlang.
U syiñ tyrkhaw ka jaitbru yong i,
Ka yachoon ya bichni;
Ka khwan myntoi ka baamsap,
Yei kaam wabha u khapnap.
Khwan spah, kwah burom wei kwah naam,
Wa i sñiawbha pyrthai;
Mynsien maya ri wahok heitæ wa ngam,
Kamwa panang moo cha thwai!
Dang em mo u Sangot u Chutia?
Uwa kbai wa sneiñ wa klam!
Yeini i mynsien ksuid wada neh rata,
Na i wow pyndooh pyndam.
Pateiñ thymme wada nang da stat,
To ya pyrkhat yillu;
U tih yurim yei bha yei miat,
Yow im ka ri ka jaitbru!
