Ha iwi i jia wa da sñiaw khyrngiat, uwi u manpa da suba wa da tynyap u ya ki arngut ki khon khian u kiwa dang soo wa ar snem deiwa ah ya u rdang ki ha Wahktieh, Nongrah Nonglum, Shillong hei miet ka 30 tarik uni u bnai.
Uni u manpa da tip pyrtuid kam u Joefreeson Jana wei da wiar u hadien wa leh ya ini i kaam.
Ki pulit leh da suba ki wa uni u manpa ye wa da pynkut u pyn yei mynsien yong oo hi hadien wa tynyap u ya ki khon u.
Ki pulit wa yahkhmat da u SP (City) Vivek Syiem da lai ki wut wut wei da kær kut ki ya ini i thaw wa jia wei da wanrah ki leh ya ki ksaw (Dog Squad) ha kani ka thaw.
Yei metyap kini ki khynnah da kit cha NEIGRIHMS yow leh ya ka Post Mortem.
Ki pulit da pyntip ki wa kam ini ym em de da jia hadien wa yoh u kem ya u Fullmoon Dhar ha u Naikhynde 2008 heiwa u Fullmoon deilang wa kiwi ki arngut da tynyap ki ya arngut ki kynthai deiwa ah yow rdang ki ha chnong Mawpdang.
Heiyatoh wa ini wa dang jia, ka takit da chem wa uni u manpa da yahke u ya ki arngut ki khon u hei janmiet ka 30 tarik heiwa ym em wa suba wow leh u ya ini i kaam.
U Rangbah Shnong ka Nongrah, u B. Pyngrope da khana u wa da pyntip cha oo da kiwa hayung hasem kini kiwa yap wei da lai e FIR ki ha Rynjah Police Station pyn hei miet heipor 11:30 hadien wa manda Phone cha u pa kini ki khynnah leh ym yoh neidaw wa da tympleh u ka Phone u.
Da khana u leh wa ki pulit da thooh ki ya u pa kini ki khynnah nadooh ynne ka sngi heipor 10:00 waje i step. Tangwa da yoh Phone u heipor 8:15 i step wa da chem yei metyap kini ki khynnah ha Wahktieh.
“I kam ka chnong wei kam uwa dang emyatoh da beiñ i ya ini wa jia iwa da pynkhyrngiat ya i wei ym em kyntien de wow ong kammon sñiaw i,” da ong u Rangbah Shnong ka Nongrah.
Da ong u leh wa uni u manpa ym toh uwa jooh em wa ujor pyrchah ya oo ha iwon iwon i kaam wei man u u bru wa jai jai.
Da khana u leh wa ha ka sngi wa jia ini, uni u manpa dang lai kreh mistri u waroh chi sngi wei ym sñiawthooh yei daw wa leh u yeini.
Neiliang ka Chairperson ka State Commission for Protection of Child Rights, ka Iamonlang Syiem deilang waka District Child Protection Officer, ka M. Warjri leh da lai ki cha ini i thaw wei da pynsñiaw ki yei sñiawsih kamjooh da beiñ ki ya ini wa jia.
U MLA warim kamjooh u UDP General Secretary, u Dr. Jemino Mawthoh da em u ha ini i thaw nadooh i step wei da beiñ u leh yeini wa leh u manpa wow chim yei mynsien ki khon yong oo hi.
