Kiwa lai puræ ka skurbah North Eastern Hill University hapoh i yahkhmat ka NEHU Students’ Union, ynne ka sngi da pynman ki yei yakhih ha pchem kani ka skurbah wei da pynman ya i lai paidbah cha kamra krehkaam u Vice Chancellor wow dawa hiar chuki neidaw wym ye u wow pynmankaam yei dawa yong ki.
Ini i yakhih ki khynnah da pynbor i ya u Vice Chancellor, u Prof. Prabha Shankar Shukla wow mih wei wow ap yei dawa ki khynnah ya iwa da booh dorkhat ki leh heiwa ka seiñ da dawa ko wow pyndap pura noh ya waroh ki kaam hikai kiwa lait thylli ha kani ka skurbah.
Hajrong ini neiliang u Prof. Shukla da pynche u wa ymtoh iwa suk wow thung ya kiwa sikai ha ka chi sngi, tangwa da pyntip u cha ki khynnah wa i khut Advertisement wow pyndap ya ki kreh waroh da lai i.
Heiyatoh wa i thung ya ki Associate Professor wa Assistant Professor, neiliang ki khynnah da kyntait ki wow thung du kam ki Contract, wei da dawa bait wow thung da kiwa pura.
Kiwa lai puræ da ong ki leh wa lada u Vice Chancellor ymye u wow e yei dawa ka NEHUSU, da toh wow hiar chuki noh u kam u VC.
Kiwi ki mat dawa ki khynnah ha NEHU toh wow pynbiang ya waroh iwa emkaam ki khynnah puræ, nadooh ki Bus, ki Hostel, ka um wa ka bordiñ.
