Ka takit wa leh da ka Special Investigation Team (SIT) yei tynyap u pa ya ki arngut ki khon iwa da jia ha i khloo wa em ha Wahktieh, Nongrah Shillong ha ka 30 tarik u Naisan heiwa da yoh wow kem ya uni u manpa uwa tip kam u Jefferson Jana ha ka miet wa bood ka 31 tarik wei da pynngat ya oo hapoh ki kyndon aiñ IPC Section 364 wa 302 wa yatoh wa i rahbor wei tynyap bru, da chem wa uni u bru da leh u yeini i kaam wa kwah u wow pynhiar tput.
Uni u manpa wa em 29 snem i rta da tynyap u ya ki khon u kiwa em 4 wa 2 snem i rta deiwa ah ya u rdang da ka tari. Heiyatoh wa ini, u SP (City) Vivek Syeiem da pyntip u wa uni u manpa da yah u ya ki pulit yow chem ya ka tari wa da pynemkaam u hawa leh yeini i kaam.
Da pyntip leh wa uni u manpa da phla u wa da leh u yeini hadien wa kwah u liwan biang cha ka kurim u tangwa ka kurim u ym bien ko wei da kwah ko wow yalait noh neibhah oo toh uwa da chah kdoh hei dih kiad wei dang dep wot u wow mih napoh Rehabilitation Centre.
Kamtæ ki pulit da ong ki wa kamwa da chem chwa katni da ye u man wa da leh uni u manpa yeini toh wa chrai u wei yow pynhiar tput tangwa ki puilit da ong ki wa ye u em kiwi ki daw ki wym pu tip neibhah ka takit dang lai ko chakhmat.
Heiyatoh wa lada uni u bru man u uwa ym biang hei bor pyrkhat pyrdaiñ, da ong wa daw hap wow pyntikna naka Rehab Centre.
