U MLA ka BJP na South Shillong Constituency, u Sanbor Shullai da ong u wa ki paidbah toh u jied noh ki ya ka BJP wow wanrah da i khyndawbilat iwa yatoh doh, heiwa da ong u wa kopsar i khyndawbilat ka sorkar wa yahkhmat da ka NPP ymyatoh doh i, neibhah kat chawa em ki thaw da haap bait ki, deiwa pynrap wa da toh wow kylliang noh ya i khyndawbilat wow synchaar da ka sorkar BJP kamwa da leh ha kiwi ki jylla ka thaaiñ mihsngi.
Da ong u wa sa 50 snem ympu ye u tyngkheiñ ya ka BJP ha Delhi, wei kiwi ki jylla kam ka Mizoram da chynna jngai ko deiwa e noh ya ka BJP wow synchaar heiwa katni da tooid i dud wa i umngap na Delhi bait, neibhah da sakhi ha Agartala, Assam, Nagaland ya ki kaam pynroi nei em ka BJP.
Da ong u wa heini ha Meghalaya em du 2 ngut ki MLA, hanla kattæ da pyrchang ki wow yarap yaklam bait ha Delhi, deiwa pynrap wa khnang wow lait na ini waroh, yi krum u lai chawi ka Team A, Team B lane C da toh u e bait ha ka BJP wow synchaar pura wei waroh i kwah ki khynroo khyllood nadooh ki kaam ki jam, iwa kwah kiwa sikai leh u yoh lut.
U Sanbor uwa da yakhun ya ka Election MP Lok Sabha ha u snem 2019, da ong u wa lada toh wa jop u kam u MP ha u snem 2019 daw wanrah u da i dud wa i umngap ha ka jylla neibhah u Amit Shah da kular u wow e chuki montri ya oo ha Delhi, tangwa katni u Vincent Pala la 5 snem da kjap sa’ut bait u ha kdong khlem leh iwon iwon.
Hawa kylli ya i rukom krehkaam ka MDA hapoh i yahkhmat ka NPP, da ong u wa yeini da e wow bichaar ki paidbah, neibhah i khyndawbilat wa katni ym yatoh doh i, neibhah kat iwa chna du iwa haap donhi.
