U Pravin Bakshi uwa man u Commissioner & Secretary ka yung krehkaam u Lat ka jylla ynne da pyntip u wa u Lat ka jylla, u Satya Pal Malik da yoh u ya ka chithi na ka Comptroller and Auditor General (CAG) ka India ha ka 8 tarik uni u bnai heiyatoh wa i wym e ki District Council ya ki yukheiñ yudiah (Accounts) cha ka CAG da boon tylli ki snem kamjooh wym jooh wanrah ki hapoh ka dorbar yong ki CAG Report.
Neiliang u Lat da chimkhia u yeini wa u Montri Rangbah ka jylla ha ka 9 tarik uni u bnai lyngba ka Phone wei da thoh u leh cha u Montri Rangbah ka jylla wow booddien smat ya ini i kaam.
Chooh chooh u Lat da ong u wa lada emkaam tæ toh wow thung da ka takit hajrong ini i kaam.
Ka CAG toh ka chnat katkam ka riti synchaar ka ri katkam ka Article 148 kawa chim ya ki yukheiñ yudiah yong waroh ki chnat sorkar pyrdi wa ka sorkar jylla wei wow puræ wow sylli ya ki.
Ki bui (Report) ka CAG toh wow wanrah ya ki ha ki yung dorbar chna aiñ ka ri wa ki jylla wow yaklam hajrong ki.
