Uwi u bru wa tip kam u Tipsuk Shabong wa chong wa sah ha Lumparing da chah kem noh u ha ki pulit hadien wa jrongkti u ya uwi u pulit pynlai kari namo u Traffic Police uwa pynlai kari ha ka thaaiñ Red Cross, Laban ynne i sngi.
Ya uni u bru da kem ki pulit ka Laban Police Station hadien wa ujor jrongkti ya u pulit uwa dang kreh yei kaam da ong u Addl. Superintendent of Police (Traffic), u Ian Onel Swer heiwa uni u bru da yah u ya ka kari wa em Number ML-05W-2777 da pynyieñ kari khlemakor u iwa da wanrah yei khynñia ya u sarok wow psiah cha Laban, wei hawa uni u pulit pynlai kari da phah kyrriah u ya kani ka kari, uni u bru da sdang u wow thooh daw wei da kynroi wei jrong kti u ya uni u pulit.
Katkam i Video, da sakhi yeiwa leh embor uni u bru wa yah kari heiwa da sakhi leh ya ki paidbah wa yarap ya uni u pulit, kiwa da beiñ yeiwa leh uni u bru iwa man iwa bakla.
U Addl. SP u Ian Swer da ong u wa ini waroh da jia i heipor kamwa 2:40 i sngi heipor wa sdang lait skur ki khynnah wei i por wa khynñia bha ki kari wei ya kani ka ujor da leh da uni u pulit wa tip kam u J Sangma, wei du hadien ini ki pulit ka Laban Police Station da kem noh ya uni u bru.
