U Montri wa pait ya ka chnat Veterinary & Animal Husbandry, u Sanbor Shullai da e por u 3 bnai ya ka Company wa pynkreh ya ka thaw choh doh ha West Jaiñtia Hills wow e kti noh cha ka sorkar, wei da pynmih u leh ya ka hukum wa toh u sangeh chi syndon i pynlait poisa cha ki Contractor katwa ym pu ye wow pyndep yei kaam.
U Montri da hiar u wow lai pait ya katai ka thaw choh doh ynnin ka sngi kawa em ha Demthring, WJH kawa dang sah tyngkreng kattu la 10 snem nadooh wa da khut ya ka Tender ha u snem 2012. U Sanbor da chem u wa i pynkreh man i iwa suki bha heiwa da pynsñiaw u yei chrai wei da phah ya ki Contractor kiwa pynkreh wa kynthup ya u Rishan Rapsang wa ka Abattoir Private Ltd kawa man ka Company na Chennai wow pyndep hapoh 3 bnai.
U Sanbor da ong u wa daw khut ya waroh ar tylli ki Company wa pynkreh ya yatai ka thaw yow soi ya ka soskular (Undertaking) wa toh u pyndep hapoh 3 bnai heiwa ka Abattoir Private Ltd toh u pyndep pyndait ya ki kor (Machine) hapoh chi bnai, katwa ya ka Company u Rapsang wow yasoi u pyndep hapoh ar bnai i kreh (Civil Work), iwa mut ha ka tayaw wa khaddooh yong uni u Naikhynde da toh u e kti noh cha ka sorkar.
Hawa kylli, da khana u wa i kreh ya katai ka thaw choh doh da mang hei lut wa T. 7.6 klur (Ynñiaw Klur Ynruphaw Lak) wei ya ka poisa da dep wow pynlait hadooh T. 5 klur katwa i kaam wa dang dep toh du kamwa 60%, wei da hukum u wym toh u pynlait poisa de hadooh wa da dep i kreh.
Neiliang kiwa yahkhmat ka JSU da khana ki wa i sangeh ya itai i kreh toh nadooh u snem 2017, wei da pynsñiaw leh yei lynngoh hajrong i sangeh, wei daw booddien ka seiñ ya ini i kaam wow pyndep hapoh 3 bnai kamwa da kular hakhmat u Montri.
