U heh ka United Democratic Party (UDP) uwa man leh u CEM ka KHADC, u Titosstarwell Chyne da ong u wa i pynbaad ya ka sorkar u em bait i, tangwa lada pynbaad emkaam wow em leh ki sabut, deiwa pynrap wa lada chem ya uwon uwon uwa emkti hei baam-tooh toh wow chah pynchitom wei toh wow chah kyntait ha ki paidbah.
Da ong chooh chooh u wa ka UDP kawa emlang ha ka sorkar da jooh beiñ ko yei baam-tooh, wei ka sorkar toh u pynmih paidbah ko ya ka bui (Report) takit hajrong i chah pynbaad baam-tooh ha ka chnat Bordiñ (MeECL).
U Titos da ong u wa lada i pynbaad man i pyrchah ya u Montri na ka UDP leh toh wow takit wow mih iwa sakhiat, tangwa emkaam wow em wa ki sabut ki sakhi wow pynsakhiat yeiwa da pynbaad, wei da ong u wa ka UDP nadooh wa sdang da pyrchah ko yei baam-tooh.
Heijooh i por da ong u wa ymjooh em kawon kawon ka sorkar ka wym chah pynbaad, wei lada ym em i chah pynbaad pynyoo i wa kiwa mihkhmat ymtoh kiwa biang, wei kitu kiwa pynbaad katni lada em ki ha ka sorkar da chah pynbaad ki kamjooh.
U Titos da ong u leh wa ym emkaam ware wow pynbaad yeiyi yeiyi neibhah ki paidbah da stat ki wei da tip ki wow pait ya kiwa mihkhmat wa da jied ki, katwon ngut kiwa klam ya ki phang wa ktah ya ki paidbah, katwon ngut ki MLA kiwa da klam da kbai ha yung dorbar.
