U MDC ka Sohra uwa man leh u Chief Executive Member (CEM) ka Khasi Hills Autonomous District Council (KHADC), u Titos W Chyne da kylli u ya ka sorkar jylla ileh wa da pynyang ko wow su ya ka tulop cha ki wakreh ka Mawmluh Cherra Cement Limited (MCCL) wei da phah yang ya ki hadooh wow pyndep ya iwa emkaam waroh i thmu pynkreh ya ka Joint Venture kani ka karkhana pynmih khyndaw-bilat, “Hadooh mynnu kattæ ka Joint Venture u man ko.”
Ki wakreh ka MCCL hapoh ka lama yong ka Mawmluh Cherra Cement Limited Employees Union, da pynman biang ki yei yakhih nadooh kani ka tayaw ha nongbah Shillong wow dawa su ya kawa dang sahteiñ wei wow pynkrehkaam biang ya katai ka karkhana pynmih khyndaw-bilat yong ka sorkar.
U Titos uwa man leh u MLA warim ka sohra ynne ka sngi da lai u wow yachem ya kitai ki wakreh ka MCCL ha i thaw pynman ya ka yakhih.
Hawa klam ha ka yalang wa tbian hakhmat ka yung krehkaam ka MCCL ha Lauchumiere, u Titos da kynthah joor u ya ka sorkar ka ym ye ko wow pynlai tang ya kawi ka karkhana, wei kammon u pynlai ko ya ka jylla, da ong u wa i tkoh krehkaam toh na ki bor pynlai.
Hajrong i thmu wow pynkrehkaam ya ka Joint Venture namo ka soskular wow ya krehlang wa ki bru samen yow pynkrehkaam biang ya katai ka karkhana, u Titos da kylli u iyi wa ka sorkar u leh ko neibhah i pynyang iwa na i por cha i por ya ki wakreh wei da dawa leh wa ka sorkar toh u pyrkhat ko ya ki wakreh, ym ye wow ong wa yei su daw e hadooh wow sdang katæ ka Joint Venture neibhah hadooh katni ym pu tip mynnu u man kaam i.
Ha iwi i liang, u Titos da pyntip u wa ha ka sngi nyngkong yong ka tayaw wow wan, deilang wa u MLA ka Shella daw yachem ki ya Montri Rangbah ka jylla, u Conrad K Sangma yow yoh yei che hajrong ini i bynta.
