U Montri Rangbah ka jylla, u Conrad Sangma ynne hawa wan pait yei chah ktah u sarokbah NH06 ha thaaiñ Lumshnong da ong u wa u slap wa da hiar ha kini ki sngi toh u wym jooh em jia kamni hadooh wa da em ki thaw hapoh ka jylla da hiar u slap hadooh wa pyntam ya iwa joor dooh 40 snem nachwa.
Kamtæ da ong u wa ini da ktah ko chiboon nadooh ki luti ki syngkieñ, ki yingkieñ, ki thaw rep, ki yung bru kamjooh i khih i khan ki bru wei daw chimpor wow kheiñ thij pa thij hadooh katwon dapoi i lutsan tangwa katkam wa da kheiñ chwa kattæ da pyntip cha ka sorkar wa da emkaam yarap T. 300 klur yow pynchna biang ya iwa da dooh, iwa da chah ktah.
Da khana u leh wa ya ini da dep u wow yaklam wa u Montri ki kaam pohyung ka ri, u Amit Shah uwa Phone leh cha oo ynne i step wei daw pyntip chooh chooh u cha oo myntu hi i janmiet.
Neiliang ka sorkar pyrdi da pyntip ko wa daw phah bru ko yow kheiñ yei lutsan yow tip katwon u e yarap.
U Conrad da pyntip u leh wa da phah ya ki bor District wow e ki waroh ki yarap cha ki bru wei mynstep daw lai u cha Mawsynram yow pait yeiwa da chah ktah wei ha ka sngi wa bood daw lai u cha Ri-loom Garo.
Ynne ha Khliehriat da pynman leh ya ka Review Meeting deiwa emlang ki heh ka District.
