Jowai: Neidaw wada ood ki paidbah iong ka thain Jaintia Hills District yei wym em u kreh kam ka LPG Home Delivery weiwa kamjooh i wa ku dor u piat, neiliang ka sein Hynniewtrep Youth Council Jaintia Hills District (HYC-JHD) hapoh i pyllai u President ka sein u I.J. Dameki Paswet wa ki para dkhot ka seiñ da lai iachem ki wa u DC ka WJH ynne ka sngi iow u pynsniaw weiwa deilang kamwa e yei thoh cha Oo hei iatoh wa kini ki ar tylli ki phang kiwa ki paidbah da chem jingeh ki.
Nei liang wym em u kreh kam ka LPG Home Delivery (iow pynpoi ia u kumkas ha iwi pa iwi i thlu iung) hadein wa u DC da dep e hukum da jan dap ar bnai ia ki gas agency kiwa em haka thain watoh u pynpoi ki ia u kumkas ha ki thlu iung, na ka liang ki gas agency ym em u chem wa leh ki kat kam ka hukum. Ka seiñ da chem ko bunsien kini ki gas agency da pynpoi ki ia ka kas tang haki kattu katni ki thaw iong ki dong weiwa ia kitu ki dong wa em ha jan da hap ki u lai chim naki ha ki thaw wada booh ki kam ka thaw e (delivery point) weiwa boonsien kthah ko ia ka por wa kordor iong ki paidbah kiwa da hap u iang da u lain iow ioh u chim kas weiwa da chim por daki phaw phaw minit wa daki kynta haroh, kani dawan rah ko ia ka jingdooh nong ia ki paidbah ha kiwa boon ki liang. Ka sein da ong haroh ko wa ia ka poisa da dep ki u kheinlang hei iatoh u pynpoi ia ka kas haduh ha thlu iung. Ini da man haroh kamwa yoobein ia ka hok (Consumer’s Right) ka iong ki paidbah wei kamjooh leh kamwa tooh ki ia ka poisa u paidbah.
Hei iatoh waka ku dor iong u piat chaduh ka Rs. 70-80/kg ha kani ka thain ka sein da pynsniaw ko ha u DC weiwa ka seiñ leh da kyrpad ko ia Oo iow chimkhia u ia kani ka ku dor u piat kawa syndet syndet hi eh. Ka sein da pyntip haroh ko wa man ki por wa ku ki dor marbam mardih, ki wholesaler da jooh chim kabu beit ki weiwa boonsien hi da wan rah beit ko ia ka dooh nong ki kup chilliang sem chilliang.
Kamwa i tip i wa u piat hi da pynem kam i ha i chet i tu kiwa boonjait. Ka seiñ leh da pynsniaw ko wa ki wholesaler boon dang em stock warim ki iong u piat uwa hei dor wa toh, manda tip ki wada ku dor u piat te dam wot chwa ki u dai kat hadooh wow poi i te i dor wa ku iong Oo, weiwa da jooh murieh beit ki cha ki kudam ki iong ki khnang iow ioh won ki u chim kabu hei dor thymme dei wow ioh nong won ki chiboon weiwa kani da wan rah ko ka jingdooh nong ia u paitbah waroh.
Na ka liang ka sein da pynsniaw ko wei da kyrpad ko ia u DC wow chimkhia u ia kini ki ar tylli ki phang wa dawa kiwa kthah ia u paidbah, ka sein da kyntu joor haroh ko wa ym hoi u e lad u ia kam kini kiwa chim kabu kiwa kthah ia ka ioh ka kot u paidbah weiwa lada chem toh u pynchitom ia ki katkam ka kyndon iong ka ain. Ka sein leh da maham joor ko ia kam kini ki bru wa chim kabu, lada ka sein chem ko ka daw leh ko katkam ki kyndon iong ka ain.
Discussion about this post