U Disparsing Rani uwa man uwi na kiwa paan RTI wa da paw bha ha ka jylla, da ong u wa hadooh 1,16,563 ngut kiwa thap kreh neibynta 119 tylli ki kreh kiwa lait hapoh Secretariat, wei da ong u wa katkam ka RTI wa da yoh, ka poisa wa ka sorkar da yoh ko na kini ki khynroo khyllood kiwa thap kreh da kynjoh i hadooh T. 57,88,367.
Katkam wa ong u Rani, ya kitai ki kreh wa lait hadooh 119 tylli da khut wow thap nadooh 9 Thohlakhmi (Feb) uni u snem, tangwa hawa thooh yutip yei daw wa slem wow khut Interview, ka chnat da ong ko wa i daw wa slem u khut Interview toh neidaw wa em ka mukotduma hapoh ka High Court ka Meghalaya, wei i pynkhreh wow pyndap ya kitai ki kreh wa lait da sdang wow pynlai chaphrang.
Heiyatoh wa ka ujor wa em i thung kreh pyrchah aiñ, u Rani da ong u wa katkam ka RTI wa da yoh u ym em kam itæ i thung kreh sop-sop lait noh kiwa kreh kam ki Casual wa da pynman da ka yong ki hi ka Interview.
U Rani da phylla u hajrong i yoh poisa ka sorkar na ki khynroo thooh kreh, neibhah em ki khynroo kiwa da thap kreh nadooh ki snem 2007 ter ter ym em u chah khut ki wow yakhun ya ki ‘Written Test’ næ ki ‘Interview’.
Ha iwi i liang u Rani da pynsñiaw u leh yei sñiawkhia heiyatoh wa i pynku kyrdan ya ki sahep wa kiwa kreh sorkar, wei da ong u wa ka sorkar ym jooh burom ko ya kiwa kreh hok, neibhah kiwa ku kyrdan (Promotion) ha kiwa boon ki chnat toh du kitu kiwa em yatoh wa ki heh.
