Ki khubor wa yatoh wa i dooh bordiñ ki chnong ki thaw dang pteiñ i hadooh katni heiwa ha kani ka kynti da em da ki spah tylli ki manyung kiwa da dooh bordiñ da palat chi bnai kattu ha Khliehriat West wei ki paidbah da hap chong ki hei doom i langoh du neidaw wa sih u wi u Transformer ha ka dong Loom Siat Thong.
Ini da wanrah i yei eh i khoo wa khroo ya ki paidbah khamtam ki khynnah skur kiwa dang pynkhreh ya ki Exam chiteiñ snem yong ki ha uni u bnai.
“Ini i dooh bordiñ toh nadooh u Naisan wei dang pteiñ i hadooh ynne ka sngi” da ong u P. Muksor uwa man u Publicity Secretary ka Jaiñtia National Council.
Chooh chooh da pynrap u deiwa ong, “U im ha kini ki sngi khlem ka bordiñ man ko iyi iyi i wym ye de wot tang u mutdur leh neibhah ha waroh ki bynta emkaam ya ka nadooh i chet i tu, i taan um dih um baam, u khreh kot ki khynnah heipor miet, u Charge mobile kamtæ ter ter”.
Sa uwi tawon uwa sah ha kani ka dong da ong u, “Man iwa sarom wa kat da ka District Headquarter, ka MeECL ym mano ko wow pynbait yeiwa sih hadooh dei yong bnai” deiwa kylli leh wa lada ha Khliehriat dang pyndooh dei yong bnai, tip chawi won kammon?
Ka seiñ JNC dei mynsien wa khia, ynne ka sngi da lai yachem ko ya u EE ka MeECL, Khliehriat Distribution Division, East Jaiñtia, neibynta wow dawa joor na ka yung krehkaam wow kylliang noh wut-wut ya u Transformer khlem pynslem de khnang wow lait noh ki paidbah u chem chitom kamni dei yong chi bnai tam.
Ya ka dorkhat wa e cha uni u sahep da phah leh cha u SE ka MeECL ha Jowai wa u DC ka East Jaiñtia Hills.