U Montri Rangbah ka jylla, u Conrad K Sangma da ong u wa i daw wa pyndooh bordiñ namo ka Load Shedding toh neidaw wymye wow pynkrehkaam ya ki 5 tylli ki thaw namo ki Unit kiwa ka jylla jooh yoh ko ya ka bordiñ wa kynthup ya ka yong ka NEEPCO wa ka OTPC natlor ki Unit kiwa man ki yong ka jylla.
Da pyntip u wa 3 tylli ki Unit wa jooh e bordiñ ym em u krehkaam ki katni, wei kini kynthup ki ya kiwa e bordiñ hadooh 110 MW, iwa pynman ya ka jylla wow duna bordiñ ko.
Da pyntip u leh wa iwi won i daw toh wa ki 3 tylli ki Unit kiwa ka jylla em ko, wa kynthup ya ka Lechka, Umïam wa Umtru kiwa dang em hapyrdi i chna pynmiat iwa ymye wow kiar, deiwa pynrap wa kamwa 42 MW na ka Lechka wa kamwa 21 MW na Umtru da chah ktah ka bordiñ.
Iwi won i daw wa u Conrad da pynsñiaw u toh wa ka jylla hap pyndep ko ya i pylnang ya ka bordiñ næ ka ‘Power Banking’, wei man-u-bnai kamwa 18 Million Unit hap su cha ki Company, neibhah ha ki por wa duna ka jylla daw ye ko wow yoh biang ya ka bordiñ.
U Montri Rangbah da ong u wa ka sorkar da yaklam yillu bha ko ya ini i kaam wow pynduna ya i chah ktah ki paidbah na i pyndooh bordiñ, neibhah wa em ki thaw wa hap pyndoh bordiñ hadooh 2-3 kynta. Heijooh i por da kyrmen u wa hapoh chi tayaw daw em ki Unit kiwa ye wow pynkrehkaam noh, deiwa kyntu leh ya ki paidbah wow man kiwa yaichah chipor wa ka sorkar.
