Ka seiñ kiwa sikai kiwa pynman yakhih hapoh ka Federation of All School Teachers of Meghalaya (FASTOM) yow pynku tulop, ynne da rai ki wow pyndam noh ya ka yakhih deiwa chong sah hajan Secretariat da palat chi tayaw.
Ya ka rai da chim hadien wa ka sorkar ynnin ka sngi da mynjur ko wow pynku ya ka poisa namo ka Grant wa da e cha ki skur wa yarap ka sorkar iwa mut wa da pynku lang ya ka yulop kiwa sikai Adhoc ha kini ki Government Aided School.
Tangwa ka sorkar won ym em mynjur ko yei dawa wow pynku da 5% man-u-snem ya ka tulop wei yeini da pyntip ka FASTOM wa daw pteiñ ki wow dawa.
Kiwa yahkhmat ka FASTOM da ong ki leh wa ini toh i jop ya kiwa sikai hanla ym yoh ki ya waroh iwa da dawa ki tangwa da man ko ka luti wow pynkylla dur ya ki kaam wa yatoh wa i puræ puthi waroh kawi hapoh ka jylla ym du ya ka tulop.
Ka FASTOM da pynsñiaw ko leh yei wym sñiawsuk yei bhah ya kiwa sikai ha kiwa boon ki kyrdan wei toh u em bait da kiwa sikai sorkar, kiwa sikai wa yoh yarap na ka sorkar wa kiwa sikai ha ki skur samen.
