U Montri Rangbah ka jylla Meghalaya, u Conrad K Sangma da pdiang u wa ka jylla Meghalaya rap duna ko hawa pynkrehkaam ya ka Pradhan Mantri Ujjwala Yojana (PMUY), namo ka Scheme wow e mynkna ya ki tandong chet (LPG Cylinder) cha ki manbei, tangwa da ong u leh wa ya kiwi won ki Scheme, ka Meghalaya da ye ko wow pynkrehkaam bha.
Ha ka 13 tarik uni u bnai, u Montri Khynnah ka sorkar pyrdi wa pait ya ka chnat Petroleum and Natural Gas and Labour & Employment, u Rameswar Teli da phah u ya ka sorkar jylla wow pynkrehkaam bha ya ki Scheme yong ka sorkar pyrdi, khamtam hawa yatoh wa ka Pradhan Mantri Ujjwala Yojana, wa ka Meghalaya dang ye ko wow pynkrehkaam du kamwa 62%, katwa cha kiwi ki jylla ka ri India da ye wow pynkrehkaam 80-92%.
Hawa klam ynne ka sngi, u Conrad da ong u wa ha ka Scheme Ujjwala da em sakhiat i duna kamwa 25% hei pynkrehkaam na kiwi won, tangwa ya kiwi ki Scheme, kam ka PMGSY ka Meghalaya toh kawa da pynkrehkaam bha ya kani ka Scheme, heiwa katni da ye wow pynkrehkaam hadooh san chah, bar ya ka san snem nachwa.
Da ong u wa ha ka Jal Jeevan Mission, ka Meghalaya toh kawa da pynkrehkaam bha dooh hapoh ka ri waroh kawi, wei yeini da pynsñiaw leh da u Montri Rangbahdooh ka ri, katwa ha ka MGNREGS Scheme, ka Meghalaya ya ini leh da pynkrehkaam bha, heiwa ha uni u snem mang tangka da mang poisa da jan poi cha ka T.1800 klur.
U Montri Rangbah da ong u wa kini kiyi kiyi ym ye wow ku lane wow man lada ym pynkrehkaam bha ya ki Scheme ka sorkar pyrdi, wei ka sorkar daw kreh chitom ko leh wow chimkhia ya iyi wa u Montri ka sorkar pyrdi da pynsñiaw u.
