Ki tre truck na Ri-loom Jaiñtia (East & West Jaiñtia Hills) kamjooh leh uwi na ki kyrtong President ka Jaiñtia Hills Truck Owners Association (JHTOA), u Balen Thubru da pynsñiaw ki yei pyrchah joor hajrong i chah knieh i hok yong ki wei i wym yoh laitlooid de ki tre truck wow thap Vote hawa jied ya u president ka seiñ kamwa jooh man waroh chi kattu kamwa la 40 snem.
Kini ki tre truck da pynkynmoo ki wa ha ka General Election kawa toh u man ha ka 11/07/2022 ha Phramer, West Jaiñtia Hills da pynpep noh ya ka neidaw wa em i awri awra heiwa ki Executive Member ka JHTOA da mut ki wow leh tooh (proxy) wow pynjop yabor khlem em wa yaleh pyrchah (Uncontested) ya u Chairman yong ka cha ka kyrdan President.
“Ini i thmu yong ki Executive Member wa ka Election Committee ka JHTOA wow chah du ya ki tre truck kiwa dadep Register ha yung krehkaam ka seiñ wa em ha Tuber Takhniang, East Jaiñtia Hills wow thap Vote man ko kawa bakla wei ka wym em yurim. Man ko du i buit wow pynjop President yabor ya u Chairman ka JHTOA, u Biangshwa Shylla uwa man leh u kyrtong wow yaleh President” da ong u Balen Thubru.
Chooh chooh da ong u wa ki tre truck yong ka Ri-loom Jaiñtia ymtoh du kiwa lai lyngba ka Takhniang tangwa em leh chiboon kiwa lai cha ka thaaiñ War-Jaintia kiwa kit Moolieh cha Bangladesh wei em leh ki truck kiwa lai cha ka thaaiñ Elaka Narpuh (Karkhana Khyndaw-bilat) wei kini leh toh ki tre truck yong ka Ri-loom Jaiñtia wei ym emkaam ki wow lai chanam cha ka yung krehkaam ka JHTOA ha Takhniang wow chim slip wei wow su T. 100/- kawi ka kari cha ka seiñ. Da pynrap u leh wa ini toh du i buit wow kamai poisa wei wow leh tooh (Proxy) heiyatoh wa i jied president.
U Balen da ong u kam u kyrtong wow yakhun ha kani ka Election President ka JHTOA wa kiwi ki tre truck kyrpaad ki ya ki Executive Member wa ya ka Election Committee wow sñiawbha elaad ya waroh ki tre truck ka Ri-loom Jaiñtia wow chimbynta lang hei wow thap vote ha ka 18 tarik kamjooh leh wow pyndooh ya ka Electoral Roll kawa da khrong poisa pyrchah aiñ ha Takhniang ha yung krehkaam ka JHTOA kawa man leh pyrchah ya ki kyndon ka riti synchaar (Constitution) ka seiñ wei kawa man leh pyrchah ya ki aiñ ka ri India wow khrong poisa ha u sarokbah NH-6
Da maham u leh wa lada i jied president ha ka 18 tarik ym man i katkam ka riti synchaar ka seiñ (JHTOA) daw pynbor ya ki (Balen wa kiwi ki tre truck) wow lai choh dwar ki ha ka yung kasari.
