Ynne ka sngi u montri rangbah ka jylla da wan wai u ya kaYaaw Sachram namo ka Jackfruit Mela 2022 ha SMELC, Dakopgre, Tura ya kawa da pynman da ka District Horticulture Office, West Garo Hills chirup wa ka Directorate of Food Processing, Government of Meghalaya.
Kam wow kdaw heini ka Mission Jackfruit da sdang ya ka ha u 2018 neibynta san snem wei da pynkrehkaam ya ka da ka Directorate of Food Processing hajrong ka thong wow kyntu kynrong ya i rukom im ha ki palatsor wei wow yarap ya kiwa rep sachram ha kiwa boon ki liang.
U Conrad hawa e yei klam da ong u wa ka Meghalaya pynmih ko hadooh T. 400 klur u sachram ha ka chi snem wei emkaam wow pynku ya i yoh i laa ki bru.
Da ong u wa ka Ri-loom Garo neidaw wa man kyrpang i suiñbneiñ wow rep ya u sachram kamtæ kiwa rep leh emkaam ki wow chim kabu ya ki laad ki luti yarap wa e ka sorkar hapoh ka Jackfruit Mission.
Da pyntip u wa ka Meghalaya ye ko wow pynmih sachram hadooh T. 1000 klur wei ini daw yoh myntoi ki 50,000 tylli ki manyung kiwa rep ha ka jylla.
