U Symbood Montri Rangbah ka jylla, u Prestone Tynsong da ong u wa neini chakhmat, ka sorkar daw thooh laad ko wow su bait noh ya ka tulop yong kiwa sikai SSA la kammon kammon man ka 3 bnai. Ya ini da ong u Prestone hadien wa yaklam wa kiwa yahkhmat yong ka MSSASA kiwa da yahchem wa oo ynnin i janmiet ka 21 tarik hadien i sahmiet wa nadooh ka sngi nyngkong yong kani ka tayaw ha sarok.
Hawa klam cha ki laad pathai khubor, da ong wa i yachem man ko kawa mihsoh, heiwa ka sorkar da kyntu ko ya kiwa sikai wow pynkut noh yei yakhih neibhah ka sorkar daw sai ko hadooh T. 122 klur yow su ya ka tulop yong kiwa sikai neibynta 4 bnai.
Hawa yatoh wa i dawa pynku tulop, u Prestone da khan u wa ka sorkar da yaklam ko wa kiwa yahkhmat ka SSA, wei neibynta wow bichaar yeiwa emkaam yong waroh ki skur nadooh ki bor pynlai wa kiwa sikai, ka sorkar da rai ko leh wow thung ya ka Education Commission, wei kani ka Commission daw bichaar ko yeiwa emkaam yong waroh ki skur.
Da ong u leh wa i pynkhreh wow mynjur ya ka Commission da ka Cabinet da lai chakhmat. Da ong wa lyngba ka Commission, waroh ki kynhun yong kiwa sikai lane kiwa pynlai skur daw phah ki yeiwa emkaam, wei daw ya e yumut won cha ka sorkar iyi wa emkaam u leh.
