Ka sorkar Meghalaya ha ka yalang ka dhab ki Montri sorkar namo ka Cabinet da rai ki wow pynman noh kam kiwa kreh sorkar wa pura ya kiwa sikai ha ki skur sorkar wa kynthup ya ki skur LP wa UP wa kiwa sikai ki wym toh kam kiwa kreh sorkar wa da thung da ki Administrator/Deputy Inspector of Schools hadien u 1994 hadooh 2007.
Ini toh hadien wa da chimkti ka sorkar ya ki skur LP ha u snem 1993 heiwa kiwa boon kiwa sikai da pynman noh ya ki kam kiwa kreh sorkar wa pura tangwa da em 2447 ngut kiwa sikai kiwa da chah ieh khlem da pynman kam kiwa kreh wa pura namo kiwa yoh ya ka Regularisation.
Ha waroh kini ki snem wa da lai kini ki wym pu em Regularise da yoh ki da ka tulop sorkar hi (Scale Pay) tangwa neidaw wym em won da leh deiwa biang, ym em won da yoh ki ya ka Pension waka ACPS tangwa deiwa leh yeini, daw man noh ki kam kiwa kreh sorkar wa pura deiwa yoh lut ya waroh ki myntoi.
Neiliang u Montri Rangbah, u Conrad Sangma da ong u wa ini toh i dawa wa da slem yong kini ki 2447 ngut wei da sñiawkmen u wow pynbna wa da ye wow leh yeni.
