Ki bor pait bor pynlai ka Meghalaya Bharat Scouts & Guides West Jaiñtia Hills ha ka thong yong ka Azadi ka Amrit Mahotsav nae ka lehkmen dap 75 snem i yoh laidlooid ka ri India. Nadooh ka sngi Pyngkat 8 tarik hadooh ka sngi Muchai 15 tarik Naisaphra da pynman ki ya ka Independence Day Week Celebration heiwa ki khynnah Scouts-Guides na ki skur waphær da wan ki wow ya chimbynta chongchit.
Ki jait yakob wa da pynman ha chityaw lynter yong kani ka lehkmen kynthup ya ka Drawing-Painting, Slogan Writing, Essay Writing, Dancing, Singing, Quiz, Debate, Extempore Speech wei ka mat kyrpang yong ki yakob waroh toh kiwa yatoh wa ka Azadi Ka Amrit Mahotsav.
Ha ka yalang pynkut wa da pynman ha District HQ. MBS&G West Jaintia Hills, u Adiam U Bthuh, Jt. District Secretary MBS&G da man u kam u chongknor hei sakhilang ka S. Tariang, District Commissioner Guides kam ka kongsan, u Hopeful Khongstia, District Treasurer MBS&G najrong i emlang ki Rovers-Rangers, Scout Master wa ki Guides Captain.
Ka S. Tariang hawa e kyntien kam ka kongsan da ong ko kam wa i lehkmen lehburom ya ka sngi wa khroo yong ka ri næ ka Independence Day Celebration ha uni u snem man ko kawa kyrpang deiwa dap 75 snem i yoh laitlooid ka ri nei chah synchaar ha kiwi ki bor wa na baar wei toh u chim leh wow pynkhroo pynkyrpang ya ka hei man yong i samen samen kam ki pateiñ kani ka juk dei wow man kiwa chong chnong wa em i kitkhlieh wei kitkhia neibynta ka ri wa ka jaitbru.
Chooh chooh da kyrsu kyntu ko leh ya ki khynnah Scout-Guide deiwa ong kam wa ka pyrthai khmied ko cha phi, to pynmyllien u im ha ki kaam wa miat wa bha deiwa pynjanai leh yei sikai wa da yoh na ki por cha ki por kiwa man ha ki dur ki rukom waphær.
Ya kani ka yalang leh burom da pynkut deiwa saam ya ki tiar sahkynmoo cha waroh ki Scouts-Guide wa dajop ha ki yakob neitae pynbood won ki kyntien khublei na ka Dolly Lamare, Unit Leader Jowai Open Unit.
