U R.L. Tariang uwa jooh man kam u MLA ka Amlarem Constituency uwa jooh man leh u Montri ka sorkar jylla kamjooh leh u kyrtong MLA ka BJP ha u 2018, ynne ka sngi deilang wa kiwa bood wa kyrchan yong oo da e ki yei kyrchaan wa pura ya u Stephanson Mukhim uwa man kam u kyrtong ka NPP ha ka Election MLA 2023 na Amlarem Constituency.
Haka yalang tbian wada khut u R.L. Tariang ya kiwa bood yong oo ha Amlarem wada emlang leh u Stephanson Mukhim, da khana u yei daw wa mih noh u naka BJP toh wa ha ki 4 snem tam wym em yoo u wa kani ka Party u leh ko iyi iyi nadooh kiwa yahkhmat ha Shillong kamjooh, kamtæ kam u bru wada rap slem haka saiñhima sima ym sñiaw yahaap u yeini.
“Ini i rukom leh ka BJP da pynman ko ya nga wow sah samen, wei kam u bru wa dang em i angnood wow yarap ya ki paidbah, pyrkhat O iyi wa nga ye O u yarap, neibhah wow yakhun da nga leh wym yoo hoi de, ki paidbah najrong ka Party wa jied O leh wym pdiang ki, kamtæ jied O u emlang noh waki paidbah deiwa em haka kynhun wa heh katæ ka NPP,” ong u R.L. Tariang.
“Hao em i hap ya pynhun hapyrdi ka NPP waka BJP hapoh ka MDA kamtæ rap suk ya nga u lai cha ka NPP”.
Neiliang u Stephanson Mukhim hawa klam da pynsñiaw u i kmen yei maya ki paidbah ya oo wei ngait skem u leh i wan kyrchaan u R.L. Tariang deilang waroh ki MDC wa haap hapoh ka Amlarem Constituency wa ki paidbah wym dam de u wow poi chaka thong i jop ha u 2023.
Ong haroh u wa dang em boon ki kaam wa sahteiñ kiwa thmu u wow pyndep hapoh ka Constituency wa kynthup nadooh i puræ puthi, ki luti syngkieñ, ka kaam uiñ sawari, i chait i khiah wa kiwi tangwa da rem noh u ha u 2018, kamtæ lada jop u ha kani ka kynti wow wan daw booddien lut u ki najrong wow wanrah sa kiwi de kiwa thymme.
