U Montri ka chnat C&RD, u Hamletson Dohling ynne deiwa emlang u MLA ka Nongkrem Constituency, u Lambor Malngiang da booh u ya u mooyurim yow chna ya ka yung krehkaam wa thymme ka Mylliem C&RD Block Office ha ka Block Headquarters wa em ha 5th Mile, Upper Shillong.
U Hamlet hawa e yei klam da ong u wa ki yung krehkaam ki Block man ki kam ki yingkieñ hapyrdi ka sorkar wa ki paidbah, kamtæ da emkaam wow chna pynmiat ki yow pynbha pynmiat yei chakri ki.
Da khana u leh wa ka sorkar da booh ko ya ka poisa kawa T. 120 klur yow chna pynmiat ya ki 40 tylli ki yung krehkaam ki Block hapoh ka jylla, heiwa kawi kawi ka Block daw yoh ki mar T. 3 klur, heiwa i chna pynmiat ya ki 6 tylli ki Block toh iwa da pyndep.
U Montri da yaroh u leh ya ka yung krehkaam ka Mylliem Block Office yei kreh chitom ki wow pynkrehkaam ya kiwa boon ki Scheme sorkar jylla wa kamjooh ki yong ka sorkar pyrdi wei ym em pynsepai ki. Da klam u leh yei jop i chna SHG hapoh ka Block iwa toh neidaw wa kreh chitom ka Block kamjooh ka Meghalaya State Rural Livelihoods Society (MSRLS).
U Montri da e khublei u leh ya u BDO uwa da mih noh, u P T Passah uwa da kreh la 9 snem hapoh ka Mylliem Block wei da pdiang u leh ya u BDO thymme u Andrew Myrthong.
Kiwi de kiwa klam toh u Lambor Malngiang, MLA Nongkrem Constituency wa u S C Sadhu, Director C&RD Department.
