Ka Hynniewtrep Integrated Territorial Organisation (HITO), ynnin i miet ka 6 tarik da pynman ko yei yang khap ha ka thaaiñ Mawryngkneng yow yoh kem ya ki Truck kiwa kit pyrchah aiñ ya u mooyong, wei ha ini i kynreh kawa da pynman waroh chi miet da yoh wow kem palat 50 tylli ki Truck, tangwa da yoh wow ujor du ya 18 tylli neibhah kiwa boon da yohlaad ki wow yut.
Hawa klam cha ki laad pathai khubor ynne ka sngi won, u President ka HITO, u Donbok Dkhar da khana u wa ini i kynreh wa da pynman waroh chimiet hadooh i por 4:00 waje ynne i step, da ujor FIR ha Mawryngkneng Police Station ya 18 tylli ki Truck. Da khana u leh wa hawa takit ya kiwa yah kari da ong bait wa kini toh ki Truck ki ‘High Level’.
Da khana u wa da pynman ya kani ka kynreh hadien wa da yoo yei klam u Symbood Montri Rangbah ka jylla wow wanrah ya ki sabut lada em i pynbaad wa em i khayi pyrchah aiñ ya u mooyong. Kamtæ neiliang yong ka seiñ daw lai booh dei dawa ha kiwa yahkhmat ka BJP kiwa em ha ka jylla, yow kyntu ya ka sorkar pyrdi wow phah takit ha ka chnat Enforcement Directorate waka Central Bureau of Investigation (CBI) hajrong ini i kaam wa yatoh wa u mooyong.
U General Secretary ka HITO, u Wanbun Dkhar da ong u wa hadien wa yoo yei tlep aitmiaw ka sorkar ya kani ka kam khayi tooh ya u mooyong, tangwa ka seiñ da chem ko da ki phaw tylli ki Truck kiwa wan na thaaiñ Jaiñtia Hills kiwa kit ya u mooyong pyrchah ya ka aiñ.
Da pyntip u wa hanla ka seiñ da dep ujor ko, tangwa neiliang ki pulit ka Mawryngkneng da ong ki wa ym ye wow Register Case hajrong katai ka FIR neibhah wa em ka kyndon wa da pynbna da ka chnat Mining & Geology Department. Da ong u wa ka seiñ ym suki ko hajrong ini i kaam pyrchah aiñ, wei daw lai chadooh ka Kachari yow pyndam ya ini i kaam pyrchah aiñ.
Hawa kylli, neiliang kiwa yahkhmat ka seiñ ym em khana ki yei pyrtuid yong ki bru kiwa emkti næ ki tre yong kitai ki kari, tangwa ya ka FIR da ujor hajrong ki kari wa da yoh u kem.
