Jowai : Ka seiñ Jaiñtia Youth Federation (CB) hajrong i thmu wa bha neibynta i bha i miat ki khynroo khyllood ka Ri-loom Jaiñtia, da lai yachem ko wa ki heh ka company Jio Mobile Network wow dawa na ka hadien wa da wan sdang kreh ko ha West Jaiñtia District wow yarap u thungkteh ya ki khynroo khyllood kiwa khlem khih khlem kreh.
“Manda ym em khih em kreh ki khynroo khyllood boonsien yah ko ya ki cha ki kaam kiwa pyrchah ya ka imlang sahlang kamtæ ka seiñ dei mynsien wa sñiaw khia da dawa ko yeini na kani ka Company” da ong u President ka JYF u ma Poipynhun Majaw.
Ka seiñ da dawa ko leh ya waroh ki company private kiwa pynkrehkaam ya ki mobile network wow yarap e khih ya ki tre ri ha ki office næ ha kiwi ki bynta yong ka company yong ki.
Heijooh i por ka seiñ da kular ko leh wow lai dawa na kiwi ki compamy private wow leh yeini neibynta i bha i miat wa ka mynried kawa tyrchaaiñ ki khynroo khyllood.
Discussion about this post