Ka Tuber Kmaishnong Social, Cultural & Sport Club da yoh ko wow wai pyrda ya ka 25th Interdong Football Tournament ynne ka sngi kam chibynta ka lehkmen ya ka Silver Jubilee yong ka Sport Club kawa daw pynkut ha u Naichiphaw.
Ya kani ka wai pyrda da pynlai da u Chairman ka Sport Club, u M.K. Ryngkhlem. Da yoh yei klam kyntu kynpham na ki kattu katni ngut ki bru rangbah yong ka chnong kam na u Tellme True Phawa, General Secretary ka Tuber Kmaishnong, na u J. Phawa, Chairman Club Tuber Kmaishnong wa na u Heibormi Shylla, General Secretary Club Tuber Kordeiñlin.
Ya ka yalehke wa sdang da pynman hapyrdi ka Tuber Wahshnong Sport Club waka Pyrdi Shnong Sport Club heiwa da jop da ka Tuber Wahshnong Sport Club da 5-0 kiwa thap da u Pynainme Phawa uwa da thap 2 kool wa mar chi kool na u Shantre Phawa, u Babun Phawa wa na Denis Lyngdoh.
Yei naam Man of the Match da yoh da u Pynainme Phawa yong ka Tuber Wahshnong Sports Club. Ki Referee kiwa pynlai ya ka yalehke toh u Saian Dkhar, u Chwaki Da-oo Dkhar, u Comez Phawa wa u Sdangme Dkhar.
Ka Tuber Kmaishnong Social, Cultural & Sport Club da e khublei ko leh ya u Graham Lyngdoh, waheh chnong warim uwa da e kyllooid mynsien da ki Boot cha waroh kiwa yalehke kiwa da chimbynta ha kani ka Tournament.
Kani ka Tournament toh kawa da pynman ha ki 3 tylli ki kyrdan kitæ ka (i) Under-14 Boys, (ii) Women’s Team wa (iii) Open to All. Waroh ki liang kiwa da ya chimbynta da em ki 31 tylli.
Ka khubor wa pynlait da u Editor/Publicity Secretary Tuber Kmaishnong, u Ioolangki Sana.
