U Montri Rangbah ka jylla, u Conrad K Sangma da ong u wa i pynbna wow pynkrehkaam ya ka Criminal Procedure Code (CrPC) wa Civil Procedure Code (CPC) ym knieh i ya i bor yong ki yung kasari ki District Council, tangwa wow e laad ya ki Judicial Magistrate wow krehkaam ha ki thaw wym em ki kasari ki District Council.
Hadien wa rai ka sorkar wow lai chaphrang wow pynkrehkaam ya ka CrPC wa CPC ha waroh kawi ka jylla, wa kynthup ha ki thaw wa haap hapoh ki Autonomous District Council, neiliang ka KHADC da pyrchah ko ya ini, wei ynne ka sngi da yachem biang ko ya u Montri Rangbah ka jylla wa ki bor ka sorkar yow yoh yei pynche hajrong i pynkrehkaam ya kini ki aiñ.
Hawa klam cha kiwa pathai khubor, u Montri Rangbah da ong u wa ka sorkar da phah ko ya ka khubor cha ka District Council wa i thmu wow pynbna ya ini toh wow e laad ya ki Judicial Magistrate wow kreh ya ki kaam ki kasari ka District, ym wow knieh noh ya i bor yong ki Council næ wow luchia ya ki kasari chnong.
Da ong u wa ya i bor yong ka District Council da yada da ka riti synchaar ka ri, kawa ymye wow knieh noh da kiwi ki bor, da pynrap u wa i pynbna wow pynkrehkaam ya ka CrPC wa CPC toh du ha ki kattu katni ki thaw ki wym em kasari ki District Council.
Da ong u leh wa ka KHADC da pynsñiaw ko yei sñiawkhia hajrong i bichaar ya ki mukotduma wa yatoh wa para jaitbru ri-loom, tangwa da ong u wa ini i pynbna ym ktah næ knieh i ya i bor ki District Council neibhah da kdaw che ha ka Para (4) yong ka riti synchaar wa ya ki mukotduma wa yatoh para jaitbru ri-loom daw chim bichaar bait da ki kasari ki District Council.
Neiliang won u Chief Executive Member ka KHADC, u Titosstarwell Chyne da pynsñiaw u wa hadien ini i yachem, ka KHADC daw yaklam biang ko mynstep chwa wow chim rai, neibhah katkam wa sñiawthooh ka CrPC wa CPC ym pynkrehkaam ya ki ha ki kasari ki District Council.
Da ong u leh wa heiyatoh wa ki mukotduma para jatbru ri-loom i bichaar daw man bait i ha ki kasari ki Council lait noh kiwi ki kyndon aiñ kiwa rap khor kam kaa POCSO wa kiwi kiwi.
