U MLA ka Mowkaiaw, u Nujorki Sungoh ynne hapoh ka Yung Dorbar Chna Aiñ ka jylla da kylli u na u Montri ka chnat PHE, u Renikton Lyngdoh Tongkhar yei daw wym em ka yung krehkaam u Superintending Engineer ka chnat PHE hapoh West Jaiñtia Hills District.
U Montri da jubab u deiwa ong wa emkaam hi wow em ka Circle ha kawi pa kawi ka District wei ka chnat dang pyrkhat ko wow leh yeini wei ka Jaiñtia Hills toh kawa emkaam wei lada ye wow em ya ki Circle, wei lada wanrah sa ar tylli, ka wi toh u em ko ha Jaiñtia Hills.
U Nujorki da ong u wa neidaw wym em kani ka yung krehkaam u SE, ki kaam wa khian kiwa toh u chimpor du kattu katni kynta wow leh da chimpor hadooh 4-5 sngi wow pyndep wei u Montri da toh u chimkhia u wow chna ya kani ka Circle.
Neiliang u MLA ka Mawlai won, u PT Sawkmie da kylli u yei daw wym em kani ka yung krehkaam ha West Jaiñtia Hills.
U Montri da jubab u wa neidaw wa da boon ware ki kaam wa hap pyndep ka sorkar khamtam kiwa yatoh waka JJM wei ya kani ka sorkar hap ko wow e 10% ka poisa, kamtæ da hap wow sai ka sorkar chiboon wow pyndep ya ini i kreh, wei nyngkong u pyndep chwa ya kani ka kreh wow pynpoi umkor cha ki yung ki bru.
Hawa kylli katwon u lut yow booh ya ka yung krehkaam u SE, u Montri da jubab u wow hap wow thung kreh ya u SE wa kiwi de kiwa emkaam wei ym ye u ong hadooh katwon wa hap wow pynlut.
U Sawkmie da ong u wa lada thung chipor da ki SE wa em ha Shillong ha West Jaiñtia Hills daw yarap ko u pyndep smat yei kreh ka JJM.
U Montri da jubab u deiwa ong wa kattæ em du 10 ngut ki SE ha waroh kawi ka jylla wei du le ngut toh kiwa em hapoh ka yung krehkaam u Chief Engineer wei waroh le ngut toh kiwa boonkaam. Deiwa pynrap wa ini ym mut wa sangeh ki kreh deiwa khana leh wa katni da em u SE Electrical, SE Rural Circle wei ki kreh da lai ki lyngba kini ki arngut ki SE.
