U President ka Hynniewtrep Youth Council, u Robertjune Kharjahrin da pynsñiaw u yei sñiawkhia wa ka sorkar India lyngba ka Ministry of Railways da pynbor ko ya ka sorkar jylla wow lai chaphrang wa ka luti rel, da ong u wa ini i pynbor ka sorkar India toh iwa tyngkheiñ ya ka synchaar ki ar sorkar (Federalism).
Da ong u wa lada ka sorkar jylla ap ko ya ini i pynbor, daw poi i por wa ka sorkar India daw pynbor ko leh ya kiwi tawon, kam wow puræ Hindi, wow khang baam doh masi wa kiwi kiwi. Da ong u, sakhiat ka sorkar Meghalaya daw ong ko wa du neidaw wa pynbor ka sorkar India daw pynkrehkaam bait ko.
Chooh chooh da ong u wa ka sorkar jylla ymtoh u pyndem ko heiyatoh wa ka luti rel, tangwa u yaklam ko iyi wa ki paidbah sñiaw ki.
Da ong wa i pynsñiaw ka sorkar jylla wa emkaam ya ka luti rel toh wow hiar ki dor ki mar, tangwa Robertjune da ong u wa lada pait won ya ka Ri-loom Garo wa da em ka luti rel kit mar, ym yoo wa da hiar ki dor yong ki mar lada nujor wa kiwi tawon ki thaw.
U Robert da ong u wa ki seiñbhalang da klam che ki wa i yaklam heiyatoh wa ka luti rel toh du lada ka sorkar India pynkrehkaam chwa ko ya ka Inner Line Permit (ILP), neibhah i pyrchah ya ka luti rel toh hajrong ka yurim wa ki baar jylla daw yoh ki wow psiah deiwa suk cha kani ka jylla, wei lada ym em ki aiñ wow khoom u kdoh yeini ym slem de ka Meghalaya u man ko kam ka Tripura wa ar.
Puræ leh: Hapoh 6 bnai u pyndep ya ka Entry wa Exit Point ha Mendipathar: Conrad Sangma